Արցախահայութեան ազգային-ազատագրական պայքարի, ղարաբաղեան շարժումին 30-րդ տարեդարձին վերաբերեալ յօդուածներ եւ տեղեկատուութիւններ պատրաստելու նպատակով Արցախի մէջ գտնուող լաթվիացի, հունգարացի, ալժիրցի, իտալացի, ռուս եւ ֆրանսացի խումբ մը լրագրողներ ու էջատէրեր Փետրուար 12-ին այցելած են Արցախի Պաշտպանութեան բանակի հիւսիսային ուղղութեամբ տեղակայուած մարտական դիրքեր ու զօրամասեր։ Այս մասին կը հաղորդէ «Երկիրմետիա»-ն:
Զօրամասերու մշտական տեղակայման վայրին մէջ լրագրողները ներկայ եղած են բանակի ուսումնական փուլի մեկնարկին նուիրուած հանդիսաւոր հանդիպումին, իսկ առաջնագիծին վրայ՝ անոնք հետաքրքրուած են գործող մարտավարական իրադրութեամբ, ծանօթացած զինծառայողներու ընկերա-կենցաղային պայմաններուն ու մարտական հերթապահութեան ընթացքին:
