Հինգշաբթի, 25. 07. 2024

spot_img

Վարդանանց Ճակատամարտի Տօնակատարութիւն Ս. Խաչ-Հարպոյեան Վարժարանէն Ներս

Հայ Կաթողիկէ Ս. Խաչ-Հարպոյեան վարժարանի աշակերտութիւնը Վարդանանց տօնը նշեց Ուրբաթ, 2 Փետրուար 2018-ին՝ օրուան պատգամախօս ունենալով գերապատիւ հայր Վարագ Վրդ. Պէրպէրեանը:

          Լիբանանի, Հայաստանի եւ վարժարանիս քայլերգներու ունկնդրութենէն ետք բացման խօսքը կատարեցին 11-րդ դասարանի աշակերտներ՝ Լոռի Տէմիրճեան, Մհեր Ճենանեան, Դուին Էքշեան եւ Ալինա Գայֆէճեան, որոնք ըսին, թէ մենք փոքր տարիքէն կը յիշատակենք այս տօնը, այսօր սակայն կը հասկնանք, որ Վարդանանց  յիշատակութիւնը տօն չէ, այլ սրբազան խորհուրդ մը, որուն ճակատամարտը ամէն օր կը մղուի մեր կեանքի ընթացքին: «Այսօր հաւատքի, հայրենասիրութեան յիշատակի օրն է, որ յաղթանակ մըն է լոյսի՝ խաւարին դէմ, յաղթանակ մը բարիի՝ չարին դէմ, յաղթանակ խաչին՝ կրակին դէմ: Այսօր եւս մենք կանչուած ենք՝ դէմ կենալու խաւարին, չարին ու կրակին՝ ըլլալով հաւատարիմ ու անյաղթ զինուորը Քրիստոսի եւ հայրենիքի»,- այս արտայայտութիւններով  իրենց խօսքը եզրափակեցին աշակերտները:

          Յայտագիրի առաջին բաժնով մանկապարտէզի կոկոն եւ ծաղիկ դասարաններու աշակերտները արտասանութեամբ ու երգով գովերգեցին Վարդանանց հերոսները: Յաջորդաբար բեմ բարձրացան 4-րդ դասարանը՝ «Հայ Ապրինք Եղբարք», «Վարդանի Ս. Արիւնին» եւ «Հայուն» երգերով, 3-րդ դասարանը՝ «Արի Հայեր» խմբային արտասանութեամբ, 3-րդ դասարանէն Յարութ Չափատարեան եւ Էլի Կարապետեան՝ «Հայրն ու Որդին» երկխօսութեամբ,  որմէ ետք դպրոցին պարախումբը ներկայացուց պար մը:

 

          Գերապատիւ հայր Վարագ Վրդ. Պէրպէրեան իր խօսքին մէջ ըսաւ, թէ ինչ որ պարսիկը իր փիղերով, ինչ որ Հռոմը իր հսկայ կայսրութեամբ, ինչ որ Բիւզանդիոնը իր սուրերով, եւ ինչ որ վայրագ օսմանցին իր կախաղաններով եւ զէնքերով չկրցաւ ընել, չըլլայ որ այդ ցեցը, որ մտած է մեր հայ ժողովուրդին մէջ, ներսէն կրծէ հայուն մարմինը եւ մեզի ներփլուզումի մատնէ: Ան նշեց, թէ մենք այսօր հայ կը մնանք, որովհետեւ Վարդանը ճակատամարտ մղեց ու թէեւ նահատակուեցաւ, բայց իր ետին հազարաւոր Վարդաններ բերաւ: Ան կոչ ուղղեց աշակերտներուն, որ չամչնան հայ ըլլալէն ու ամօթ չհամարեն հայերէն խօսիլը: «Լաւ է ֆրանսերէն խօսիլը, լաւ է անգլերէն գիտնալը, բայց այս բոլորը մեզի ո՛չ Վարդան կը դարձնեն, ո՛չ Գրիգոր Լուսաւորիչ կը բերեն, ո՛չ ալ Շնորհալի մը կրնան տալ»,- ըսաւ գերապատիւ վարդապետը: Ան կոչ ուղղեց վարժարաններուն եւ միութիւններուն միասնաբար աշխատելու հայ ժողովուրդի բարիքին համար, պարծենալու եւ հպարտանալու հայութեամբ, որովհետեւ ամբողջ աշխարհը միայն մէկ յարութիւն կը նշէ՝ Քրիստոսի յարութիւնը, իսկ մենք՝ երեք յարութիւն, Քրիստոսի, Վարդանանցի եւ Մեծ Եղեռնի մէկուկէս միլիոն նահատակներուն յարութիւնը:

 

        Հանդիսութեան աւարտին խօսք առաւ վարժարանիս վարչական մեծաւոր Պրն. Արամ Գարատաղլեան եւ տնօրէնութեան անունով շնորհակալութիւն յայտնեց բոլոր անոնց, որոնք պատրաստեցին եւ ներկայացուցին օրուան յայտագիրը: Ան շնորհաւորեց նաեւ Վարդան, Վահան եւ Ղեւոնդ անուն կրողները, ինչպէս նաեւ աշակերտներուն յաջողութիւն մաղթեց իրենց կիսամեայ քննութեանց առիթով: 

ԼՐԱՏՈՒԱԿԱՆ ՄԱՐՄԻՆ
ՀԱՅ ԿԱԹՈՂԻԿԷ Ս. ԽԱՉ – ՀԱՐՊՈՅԵԱՆ ԲԱՐՁՐԱԳՈՅՆ ՎԱՐԺԱՐԱՆԻ    

 

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին