26 Յունուարին ժամը 15:00-ին ՀՀ սփիւռքի նախարարութեան նախաձեռնութեամբ Պոլսոյ «Ժամանակ» օրաթերթի հիմնադրման 110-ամեակի առթիւ Հայ Բարեգործական Ընդհանուր Միութեան երեւանեան մասնաճիւղին մէջ տեղի պիտի ունենայ յոբելեանական շնորհահանդէս (Մելիք-Ադամեան 2/2):
Բացման խօսքով հանդէս պիտի գայ Սփիւռքի նախարար Հրանոյշ Յակոբեան:
Ողջոյնի խօսքով հանդէս պիտի գայ նաեւ ՀԲԸՄ կեդրոնական վարչութեան Հայաստանի ներկայացուցչութեան ղեկավար Յովիկ Էօրտէկեան:
Շնորհահանդէսի ընթացքին պիտի ներկայացուին Վահան Թէքէեանի, Երուխանի, Ռուբէն Զարդարեանի «Ժամանակ-100» մատենաշարով լոյս տեսած գիրքերը:
Այնուհետեւ «4 գիրքերու գրականագիտական արժեւորում» եւ «Դարադարձէն ի վեր նոր ձեռքբերումները» թեմայական նիստերուն զեկուցումներով հանդէս պիտի գան Սփիւռքի նախարարի տեղակալ Սերժ Սրապիոնեան, ԵՊՀ Հայ բանասիրութեան հիմնարկի տեկան Արծրուն Աւագեան, Հանրային ձայնասփիւռի տնօրէն Մարք Գրիգորեան, հրապարակախօս Տիգրան Պասկեւիչեան, հեռուստատեսային վերլուծաբան Գեղամ Մանուկեան եւ այլք:
Միջոցառման աւարտին ելոյթ պիտի ունենայ «Ժամանակ» օրաթերթի գլխաւոր խմբագիր Արա Գոչունեան:
