«Անվտանգութեան խորհուրդի կազմաւորման եւ գործունէութեան մասին» Հայաստանի Հանրապետութեան օրէնքի նոր նախագիծին համաձայն՝ Անվտանգութեան խորհուրդը պիտի գլխաւորէ վարչապետը: «Անվտանգութեան խորհուրդի կազմաւորման եւ գործունէութեան մասին» Հայաստանի օրէնքի նախագիծը կառավարութեան 25 Յունուարի նիստի օրակարգին վրայ է:
Ըստ մշակուած նախագիծին՝ Անվտանգութեան խորհուրդը կը սահմանէ պաշտպանութեան ոլորտի քաղաքականութեան հիմնական ուղղութիւնները: Անվտանգութեան խորհուրդին մաս պիտի կազմեն վարչապետը (որ պիտի գլխաւորէ խորհուրդը), առաջին փոխվարչապետը, փոխվարչապետները, Անվտանգութեան խորհուրդի քարտուղարը, Պաշտպանութեան նախարարը, Արտաքին գործոց նախարարը, Ազգային Անվտանգութեան ծառայութեան տնօրէնը, Ոստիկանութեան պետը եւ Զինուած ուժերու գլխաւոր շտապի պետը:
Անվտանգութեան խորհուրդը պաշտպանութեան ոլորտի քաղաքականութեան հիմնական ուղղութիւններուն վերաբերող հարցերու պարագային, իրաւասու է որոշումներ ընդունելու, իսկ իր իրաւասութեան մէջ մտնող այլ հարցերու պարագային խորհրդատուական բնոյթի որոշումներ կրնայ առնել:
