Սիրելի բարեպաշտ ժողովուրդ ի հայրենիս եւ ի սփիւռս,
Մայր Աթոռ Սուրբ Էջմիածնից տարեմուտի տօնական բերկրութեամբ ողջունում ենք ձեզ եւ բերում Հայրապետական Մեր օրհնութիւնը:
Մեր սրտերն այս պահին լի են բարի ակնկալիքներով, առ Տէրն աղօթքով եւ Տիրոջ պարգեւների հայցով: Բոլորիս մաղթանքն ու ցանկութիւնն է, որ նոր տարում ձեռքբերումներն ու ուրախութիւնները բազմապատկուեն, մտահոգութիւնները փարատուեն, զօրանայ մեր հայրենիքը, ամուր լինեն մեր ընտանիքները, բարօր ու ապահով ապրի աշխարհասփիւռ մեր ժողովուրդը: Նուիրական այսպիսի զգացումներով ենք քայլ կատարում ամանորի սեմից ներս՝ անդրադառնալով նաեւ անցնող տարուան:
2017 թուականին մեր ժողովուրդը ջանք ու աշխատանք գործադրեց յաղթահարելու իր կեանքի խնդիրները, բարօրութեան եւ առաջընթացի մէջ հաստատելու մեր երկիրը: Աշխատաւոր, մտաւորական, գործարար, պետական գործիչ, ամէն ոք իր ասպարէզում՝ ջանք գործադրեց իր նպաստը բերելու մեր ժողովրդի առաջընթացին: Հայրենեաց սահմանները քաջութեամբ պաշտպանեցին մեր բանակի խիզախ զինուորները՝ երաշխաւորները մեր ժողովրդի խաղաղ ու ստեղծագործ կեանքի: Հոգեւոր-եկեղեցական մեր անդաստանը նոյնպէս արդիւնաւորուեց եկեղեցականների բարի ծառայութեամբ, մեր ժողովրդի զաւակների հաւատաւոր ընթացքով ու եկեղեցանուէր ձեռնարկներով: Տիրոջ ողորմութեամբ դժուարութիւնները մեզ չընկճեցին, իսկ ձեռքբերումներով առաւել յուսադրուեցինք: Մեր ժողովրդին կորով ու գործելու եռանդ պարգեւեցին մեր երկրի, ազգի, մեր երեխաների հանդէպ սէրը, լուսաւոր գալիք կերտելու մեր իղձերն ու տեսլականը:
Եկող 2018 թուականին մենք տօնելու ենք 100-ամեակը Հայաստանի առաջին Հանրապետութեան հաստատման եւ մայիսեան հերոսամարտերի: Մէկդարեայ այս ժամանակաշրջանում մեր ժողովուրդը ազգային կեանքի բարձրացման մեծ ճանապարհ է անցել: Այդ տասնամեակները, բազում դժուարութիւններով հանդերձ, եղան պետականաշինութեան, հայրենակերտումի, գիտութեան, կրթութեան, մեր մշակոյթի զարգացման, ի սփիւռս աշխարհի ազգային կեանքի կազմակերպման, առաջընթացի ու վերազարթօնքի տարիներ:
2018 թ., սիրելիներ, դիմաւորենք կարեւորելով մեր ժողովրդի ձեռքբերումները, դիմաւորենք նաեւ նախանձախնդրութեամբ՝ առաւել ու առաւել ջանքեր բերելու յանուն մեր հայրենիքի շէնացման ու զօրացման, ազգային մեր իղձերի մարմնաւորման: Որպէս Քրիստոսի հաւատարիմ ժողովուրդ, որպէս պետութիւն ունեցող ազգ՝ պատասխանատուութեամբ, միմեանց հանդէպ սիրով եւ Աստծոյ օրհնութիւնը հայցելով մեր գործերին՝ շարունակենք ծառայել պետական, ազգային ու հոգեւոր մեր կեանքի առաջընթացին: Տարեմուտի այս պահին նորովի է հնչում առաքեալի պատուէրը. «Իմաստութեամբ վարուեցէք… օգտագործելով ժամանակը» (Կող. Դ 5): Մեր կեանքի ժամանակը արժեւորենք իրականացնելով մեր հոգու երազները՝ մեր հայրենիքի փառքի եւ մեր ժողովրդի երջանկութեան համար:
Սիրելիներ, կիսենք միմեանց հետ տարեմուտի ուրախութիւնը, զօրանանք յոյսով ու լաւատեսութեամբ: Օգնենք կարօտեալներին, ձեռք մեկնենք միայնակ ու անօգնական մարդկանց, մեր զաւակներից բացի խնդութիւն պարգեւենք խնամքի կարօտ երեխաներին: Սատար ու զօրակից լինենք հայոց բանակին: Թող ամուր լինի մեր բանակը, հաւատքով ամուր՝ մեր ժողովուրդը: Աղօթում ենք աշխարհի խաղաղութեան համար: Խաղաղութիւն ու բարօրութիւն ենք մաղթում հայրենի մեր երկրին, նոր ձեռքբերումներ՝ հայրենի իշխանութիւններին եւ մեր ժողովրդին՝ ի Հայաստան, Արցախ եւ ի Սփիւռս: Թող Աստուած` պարգեւատուն ու առատացնողը ամէն բարիքների, օրհնի մեր երկիրն ու ժողովրդին՝ Սուրբ Ծննդեան շնորհները հեղելով մեր կեանքին:
Շնորհաւոր նոր տարի:
