Բարգաւաճ Հայաստան կուսակցութեան ղեկավար Գագիկ Ծառուկեան Դեկտեմբեր 28-ին այցելեց Կիւմրի՝ յարգելու համար երկրաշարժի զոհերուն յիշատակը:
Կիւմրիի մէջ Ծառուկեան յայտարարեց, որ 100 միլիոն դրամ կը նուիրէ Կիւմրեցիներուն:
«Ես կը սիրեմ Կիւմրին, կիւմրեցիները կը սիրեմ իբրեւ հիւրասէր, տեղը-տեղին, ու ես ո՛չ թէ ընտրութենէ-ընտրութիւն կու գամ, այլ կը սիրեմ այդ մարդոց սովորութիւնը, աւանդոյթը, խօսքի տէր ըլլալը: Անոր համար ես ամէն տարեվերջին կու գամ շնորհաւորելու մարդոց, զանոնք յուսադրելու եւ որոշ չափով օգնութիւն տրամադրելու: Ինչպէս ըսեմ՝ իւրաքանչիւր պետութեան հարստութիւնը սովորական ժողովուրդն է, որ մենք պէտք է ուշադրութիւն դարձնենք, թէ այդ մարդիկ մեր հարստութիւնն են, ուժն են եւ որ անոնք ալ պէտք է կարենան յոյսով, հաւատով ապրիլ, իրենց փոքրիկներուն առջեւ պարզ ճակատով ըլլալ: Գոնէ այդ ուրախ տօնը կարենան ընտանիքով նշել, որ, այո՛, թէկուզ միս ալ ըլլայ, կարագ ալ ըլլայ, այդ Նոր Տարուան օրը գոնէ յոյսով ու հաւատով ողողուած լաւ ըլլայ»,- յայտնեց Ծառուկեան:
Ան նշեց, որ ճիշդ այդ պատճառով 100 միլիոն դրամ տրամադրած է իր գործընկերներ Վարդեւան Գրիգորեանին ու Վարդան Ղուկասեանին, որպէսզի 50 միլիոնը բաժնեն տնակներու բնակիչներուն, 50-ն ալ՝ ծանր պայմաններու մէջ գտնուողներուն:
