Այցելութեան բերումով Փարիզ գտնուող Հայաստանի Հանրապետութեան արտաքին գործոց նախարար Էդուարդ Նալպանտեան հանդիպում ունեցած է ֆրանսահայ համայնքի ներկայացուցիչներուն հետ:
ՀՀ ԱԳՆ մամուլի եւ տեղեկատուութեան վարչութեան փոխանցած տեղեկութիւններով՝ հանդիպման ընթացքին Էդուարդ Նալպանտեան ներկայացուցած է Ֆրանսա իր այցելութեան նպատակները եւ օրակարգը, հայ-ֆրանսական յարաբերութիւններու յետագայ ամրապնդման ու զարգացման նպատակով ձեռնարկուող քայլերը:
Նախարարը հանգամանալից անդրադարձած է ղարաբաղեան հիմնախնդիրի խաղաղ հանգուցալուծման ուղղութեամբ Հայաստանի եւ ԵԱՀԿ Մինսկի խումբի համանախագահ երկիրներուն կողմէ գործադրուող ջանքերուն, հիմնահարցի կարգաւորման գործընթացի վերջին զարգացումներուն:
Էդուարդ Նալպանտեան Ֆրանսայի հայ համայնքի ներկայացուցիչներուն տեղեկացուցած է Հայաստանի եւ Եւրոպական միութեան միջեւ Համապարփակ եւ ընդլայնուած գործընկերութեան համաձայնագիրով նախատեսուած համագործակցութեան հեռանկարներուն մասին:
ԱԳՆ ղեկավարը հանդիպման մասնակիցներուն ծանօթացուցած է միջազգային ու տարածաշրջանային հրատապ խնդիրներուն վերաբերեալ Հայաստանի մօտեցումներուն, Հայաստանի արտաքին քաղաքականութեան առաջնահերթութիւններուն:
Էդուարդ Նալպանտեան անդրադարձած է Վիեննայի մէջ կայացած ԵԱՀԿ նախարարական խորհուրդի արդիւնքներուն, Սեւծովեան տնտեսական համագործակցութեան կազմակերպութեան մէջ Հայաստանի նախագահութեան:
Ֆրանսահայ համայնքի ներկայացուցիչներու հետ հանդիպման ընթացքին առանձնայատուկ տեղ յատկացուած էր Երեւանի մէջ յաջորդ տարի կայանալիք ֆրանսախօս երկիրներու միջազգային կազմակերպութեան գագաթնաժողովի նախապատրաստական աշխատանքներուն:
