Թրքական ճարտարապետութեան թանգարանին մէջ բացուած է օսմանեան կայսրութեան շրջանին հայերու կողմէ կառուցուած շինութիւններու առցանց ցուցադրութիւն, կը հաղորդէ «armedia.am»-ը:
«Հայ ճարտարապետները ակնառու դեր ունեցած են Օսմանեան կայսրութեան տարածքին դղեակներու եւ պետական մարմիններու շէնքերու կառուցման մէջ: Կայսրութեան ճարտարապետներու միութիւնը, որ ղեկավարած է այդպիսի շինարարական նախագիծեր, միշտ ներառուած են հայ ճարտարապետները», –կ’ըսուի ցուցադրութեան նկարագրութեան մէջ:
Թանգարանի կայքին մէջ կը պատմուի Պալեան գերդաստանի 5 սերունդներու՝ Կ. Պոլսոյ մէջ նախագծած եւ կառուցած բազմաթիւ մեծ շինութիւններու մասին: Պալեան ընտանիքին կողմէ կառուցուած ամենախոշոր շինութիւնը Տոլմապահչէն է, որ կը համարուի 19-րդ դարու աշխարհի լաւագոյն ապարանքներէն մէկը:
Թանգարանի կայքին մէջ կը նշուի նաեւ, որ 16-րդ դարուն օսմանեան գլխաւոր ճարտարապետը եւ ճարտարագէտ-շինարարը հայկական ծագում ունեցող Միմար Սինան է:
