19 Դեկտեմբեր 2017-ի երեկոյեան Արամ Ա. Վեհափառ հայրապետը վեհարանի դահլիճին մէջ միաբան հայրերու ու հիւրերու ներկայութեան, Մեծի Տանն Կիլիկիոյ կաթողիկոսութեան «Ս. Մեսրոպ Մաշտոց»-ի շքանշանով պարգեւատրեց Վերոնիք Կարեւորեանը:
Նախքան պարգեւատրումը, ֆրանսերէնով կարդացուեցաւ Վերոնիքի ողբացեալ ամուսնոյն` տոքթ. Յարութիւն Կարեւորեանի կենսագրութիւնը եւ յատկապէս իր բերած նպաստը հայ գրականութեան ու մշակոյթին: Ապա, ֆրանսերէնով խօսք առնելով վեհափառ հայրապետը, նշեց, թէ հայ մշակոյթը տիրական ներկայութիւն եղած է տոքթ. Կարեւորեանին, ինչպէս նաեւ տիկին Վերոնիքի կեանքին մէջ, հակառակ ֆրանսացի ըլլալուն: Ան յայտնեց, որ իբրեւ յիշատակ իր ամուսնոյն, տիկին Վերոնիք 750.000 ամերիկեան տոլարի գումարով հիմնադրամ մը հաստատած է կաթողիկոսարանին մէջ, որուն նպատակը պիտի ըլլայ քաջալերել հայ-ֆրանսական մշակութային յարաբերութիւնները, ինչպէս նաեւ ֆրանսերէնի ուսուցման առնչուած ծրագիրները:
Հիմնադրամի յանձնախումբին մաս կը կազմեն Նարեկ արք. Ալեէմէզեան, Վերոնիք Կարեւորեան եւ Միմի Եոզկաթեան:
