Գարեգին Բ․ Ամենայն Հայոց Կաթողիկոսի տնօրինութեամբ` Ամանորի գիշերը Մայր Աթոռ Սուրբ Էջմիածինի մէջ Գոհաբանական մաղթանքին պիտի յաջորդէ նուռի օրհնութիւնը: Նռնօրհնէք պիտի կատարուի Հայաստանեաց Առաքելական բոլոր եկեղեցիներուն մէջ: Ամանորի խորհրդանշական աւանդոյթ դարձած արարողութիւնը տեղի կ’ունենայ 2014 թուականէն ի վեր:
Հայկական աւանդութեան մէջ նուռը` որպէս ազգային խորհրդանիշ, կը կրէ կեանքի, ծաղկունքի եւ առատութեան իմաստը:
Քրիստոնէական խորհրդաբանութեան մէջ նուռը խորհրդապատկերն է Յիսուս Քրիստոսի հեղած արեան` խորհրդանշելով նաեւ տիրոջ հրաշափառ յարութիւնն ու Աստուծոյ շնորհներու բազմազանութիւնը:
Հայոց եկեղեցու վարդապետներու եւ հայրերու մեկնութիւններուն մէջ նուռը կը ներկայացուի նաեւ այն իմաստով, որ նուռի հատիկներուն պէս եկեղեցւոյ անդամները շատ ու բազմատեսակ են, սակայն պատուած են նռան նման պինդ կեղեւով` միաւորուած մէկ եկեղեցւոյ մէջ:
