ՆԱԹՕ-ի գլխաւոր քարտուղարի տեղակալ Ռոզ Կոթեմէոլլըր, որ Հայաստան այցելած էր, Դեկտեմբեր 13-18 իրականացուող «ՆԱԹՕ-ի շաբթուան» ծիրէն ներս, կը կարծէ, թէ ղարաբաղեան հակամարտութեան հանգուցալուծումը դրական անդրադարձ պիտի ունենայ նաեւ ամբողջ տարածաշրջանին վրայ:
Ըստ «Armenpress.am»-ի՝ ան այս մասին յայտարարած է Երեւանի պետական համալսարանէն ներս ուսանողներու հետ հանդիպման ընթացքին:
«Կը ցաւիմ, որ անցած է աւելի քան քսանհինգ տարի, սակայն հակամարտութիւնը դեռ լուծուած չէ: Հայաստանի եւ Ազրպէյճանի համար ասիկա կարեւոր է միասին աշխատելու հարցով: Ես գոհ եմ, որ վերջերս չորս նախարարները հանդիպեցան Վիեննայի մէջ, իսկ Հոկտեմբերին հանդիպեցան նաեւ նախագահները: Կը կարծեմ, որ ասիկա գերազանց է: Ես կրնամ գոհունակութիւնս յայտնել, որ Ամերիկայի Միացեալ Նահանգները՝ իբրեւ ԵԱՀԿ Մինսկի խումբի համանախագահ՝ նման բարձր մակարդակով ներգրաւուած է ՌԴ արտաքին գործոց նախարար Սերկէյ Լաւրովի, ինչպէս նաեւ ֆրանսական կողմին հետ: Ես` իբրեւ ՆԱԹՕ-ի նախագահութեան ներկայացուցիչ, կրնամ ըսել, որ մենք պարզապէս յոյս ունինք տեսնելու նոր պահ ճգնաժամը լուծելու հարցով»,- ըսած է ՆԱԹՕ-ի ներկայացուցիչը՝ ընդգծելով, թէ գոհ են գործադրուող դիւանագիտական ջանքերով եւ յոյս յայտնած, որ անոնք շուտով արդիւնք պիտի տան:
