Երեւանի քաղաքապետարանի եւ «Փասքալ եւ Տիոտաթօ» կազմակերպութեան նախաձեռնութեամբ մայրաքաղաքի հիւսիսային պողոտային մէջ տեղի ունեցաւ արդէն աւանդական դարձած Ամանորի եւ Սուրբ ծննդեան տօնավաճառի բացման հանդիսաւոր արարողութիւնը: 6-րդ տարին անընդմէջ տեղի ունեցող տօնավաճառի բացման պատիւը այս անգամ վերապահուած է ամերիկահայ երգիչ, երգերու հեղինակ, «Կրեմմի» մրցանակակիր «Capital Cities» փոփ խումբի անդամ Սեպուհ Սիմոնեանին:
Տօնավաճառի բացման արարողութեան ներկայ գտնուած է նաեւ Երեւանի քաղաքապետի տեղակալ Արամ Սուքիասեանը, կը յայտնէ քաղաքապետարանի մամուլի ծառայութիւնը:
Տօնավաճառի մօտ 40 տաղաւարները կը ներկայացնեն Ամանորի եւ Սուրբ ծննդեան խորհրդանիշներ, տօնական զարդեր, յուշանուէրներ, տօնական կերակրատեսակներ եւ այլն: Յատկանշական է, որ կան նաեւ շարք մը բարեգործական տաղաւարներ:
Տօնավաճառը բաց պիտի մնայ մինչեւ 2018 թուականի Յունուար 7-ը, ամէն օր` ժամը 10:00 – 22:00:
