Վրաստանի մայրաքաղաք Թիֆլիսի մէջ Դեկտեմբեր 10-ին մեկնարկած են հայ ժամանակակից երաժշտութեան օրեր:
Նախագիծը տեղի կ’ունենայ Հայ-վրացական մշակութային համագործակցութեան ծիրէն ներս Հայաստանի կոմպոզիտորներու (երգահաններու-ԵՌԳ․) միութեան նախաձեռնութեամբ եւ Վրաստանի կոմպոզիտորներու միութեան գործընկերութեամբ: Ծրագիրի նպատակն է հայ ժամանակակից երաժշտութեան հանրահռչակումը եւ տարածումը, ինչպէս նաեւ երկու երկիրներու միջեւ մշակութային կապերու ամրապնդումն ու զարգացումը:
Եզրափակիչ համերգը տեղի կ’ունենայ Դեկտեմբեր 11-ին Վրաստանի կոմպոզիտորներու միութեան դահլիճին մէջ:
Հայ ժամանակակից երաժշտութեան օրերու ծիրէն ներս կը կատարուին երգահաններ՝ Արամ Սաթեանի, Ռոպերթ Աթայեանի, Գագիկ Հովունցի, Լեւոն Չաւուշեանի, Վահրամ Պապայեանի, Կոնսթանթին Պետրոսեանի, Վաչէ Շառաֆեանի, Ջենի Ասատրեանի, Գրիգոր Առաքելեանի, Աշոտ Ղազարեանի, Նարինէ Զարիֆեանի, Յովհաննէս Մանուկեանի եւ Էդմոնդ Մակարեանի կամերային ստեղծագործութիւնները:
Նախագիծին աջակիցն է ՀՀ մշակոյթի նախարարութիւնը:
2015-ին Երեւանի, Կիւմրիի եւ Վանաձորի մէջ տեղի ունեցած էին վրաց ժամանակակից հեղինակներու ստեղծագործութիւններու 3 համերգ:
