Սպիտակի երկրաշարժի 29-րդ տարելիցի առիթով` Արցախի Հանրապետութեան նախագահ Բակօ Սահակեան Դեկտեմբեր 7-ին հանրապետութեան բարձրաստիճան ղեկավարութեան ուղեկցութեամբ այցելած է Ստեփանակերտի յուշահամալիր եւ ծաղկեպսակ դրած երկրաշարժի անմեղ զոհերու յիշատակը յաւերժացնող յուշակոթողին:
Յուշահամալիր այցելած են նաեւ Ազգային ժողովի նախագահ Աշոտ Ղուլեան, պետական նախարար Արայիկ Յարութիւնեան, այլ պաշտօնատար անձիք, մտաւորականներ, տարբեր գերատեսչութիւններու, կազմակերպութիւններու եւ կրթական հաստատութիւններու անձնակազմեր, որոնք ծաղիկներ ու ծաղկեպսակներ դրած են երկրաշարժի զոհերու յիշատակը յաւերժացնող յուշակոթողին:
Արցախի թեմի առաջնորդ Պարգեւ արքեպիսկոպոս Մարտիրոսեանի հանդիսապետութեամբ աղէտալի երկրաշարժի զոհերուն նուիրուած` տեղի ունեցած է ոգեկոչման եւ հոգեհանգստեան արարողութիւն:
Այս մասին կը հաղորդէ Արցախի Հանրապետութեան նախագահի աշխատակազմի տեղեկատուութեան գլխաւոր վարչութիւնը:
