Հայերուս պայքարը գոյատեւման եւ հաւատքի համար 18 դարու պատմութիւն ունի: Անիկա սկսած է քրիստոնէութիւնը իբրեւ սեփական կրօն ճանչնալու արշալոյսէն եւ կը շարունակուի մինչեւ այսօր: Ու մշտապէս, երբ նենգ թշնամին յարձակած է` ոչնչացնելու մեր ժողովուրդը եւ անոր քրիստոնէական հաւատքը, բռունցքուած են բոլորը` պահպանելու եւ փրկելու ազգային ինքնութիւնը, պատիւն ու Հայ առաքելական եկեղեցին:
Այս խորիմաստ փիլիսոփայութիւնը կը կրէր Դեկտեմբեր 3-ին «Ռաֆայէլ Ջաւախք» կրթամշակութային կեդրոնին կազմակերպած ցերեկոյթը, որ անջնջելի տպաւորութիւն ձգեց ներկաներուն վրայ: Ձեռնարկը պատրաստուած էր կեդրոնի հայ ժողովուրդի եւ հայոց եկեղեցւոյ պատմութեան խմբակներու (ղեկավարներ`Ռիմա եւ Անահիտ Սահակեաններու) կողմէն: Հանդիսատեսի աչքին առջեւէն անցան ո՛չ միայն Աւարայրի պատմական դրուագները, այլեւ հայերու հերոսական պայքարի բազում այլ փաստեր` Ցեղասպանութիւն, Հայրենական պատերազմ,Սարդարապատ, Արցախեան հերոսամարտեր, Ապրիլեան քառօրեայ պատերազմ:
Թատերականացուած, ասմունքով եւ երգչախմբային կատարումներով հարստացուած ցերեկոյթը` մանկական եւ պատանեկան շուրթերով ամրագրուած մեր երդումն էր աչքի լոյսի պէս պահպանել Վարդանանց մարտին զոհուած հերոսներուն ձգած աւանդոյթները, մասկանցիլ հզօր հայրենիք ստեղծելու եւ ցանկացած ոսոխի դիմագրաւելու պայքարին: Շուրջ 60 սան մասնակցեցաւ «Շարունակուող Աւարայրը» ձեռնարկին:
Կեդրոնի ղեկավար Ժորա Սնխչեանը եւ շրջանի հոգեւոր հովիւ Տէր Արմաշ Պօղոսեանը բարձր գնահատեցին եւ գովերքի խօսքեր յղեցին ձեռնարկի կազմակերպիչներուն եւ ամբողջ անձնակազմին, որոնց համատեղ աշխատանքին եւ գիտակցուած մօտեցման արդիւնքն էր գեղեցիկ եւ հայրենասիրական մեծ ոգիով տոգորուած ցերեկոյթը:
«ՌՋ» կեդրոնի մամլոյ դիւան
