Լեհաստանի մէջ հաւատարմագրուած դիւանագիտական առաքելութիւններու ղեկավարներու կանանց (ամուսիններու) ընկերակցութիւնը (SHOM), Վարշաւայի Marriott հիւրանոցին մէջ Դեկտեմբեր 3-ին կազմակերպած է Ամանորին նուիրուած հերթական 10-րդ բարեգործական տօնավաճառը, որուն մասնակցած է նաեւ ՀՀ դեսպանութիւնը:
Լեհաստանի մէջ ՀՀ դեսպան Էտկար Ղազարեան, այս առիթով, Facebook-ի իր էջին գրած է. «Տօնավաճառ կ’իրականացուի Լեհաստանի առաջին տիկնոջ` Ակաթա Գարնհաուսըր-Տուտայի բարձր հովանիին ներքոյ: Տօնավաճառին քանի մը տաղաւարով կը մասնակցի նաեւ Լեհաստանի մէջ ՀՀ դեսպանութիւնը` ներկայացնելով հայկական յուշանուէրներ, զարդեր, քոնեակներ, գինիներ, քաղցրաւենիք, աւանդական ճաշատեսակներ:
Տօնավաճառի բացման հանդիսաւոր արարողութենէն ետք շրջայցի ընթացքին Հայաստանի տաղաւար այցելած եւ գնումներ կատարած է նաեւ Լեհաստանի Առաջին տիկինը: Հայաստանի տաղաւարի ներկայացման մասնակցած են Լեհաստանի մէջ ՀՀ դեսպան Էտկար Ղազարեանը, Գրաքով բնակող հայ քանդակագործ Անի Մուրատեանը, «Հայ-լեհական կապերու զարգացման կեդրոն» հասարակական կազմակերպութիւնը, հայկական աւանդական զարդանախշերով գօտիներու արտադրութեամբ զբաղող Պժեմիսլաւ Զամվրիցքին, Վարշաւայի եւ Լեկիոնովոյի հայկական ճաշարանները եւ այլն:
Տօնավաճառի մշակութային ծրագիրի ծիրէն ներս հայկական երգերու կատարումներով հանդէս եկան Վարշաւայի մէջ բնակող հայ երգիչներ Արթուր Գիւրջեանը, Սոնա Մաթեւոսեանը եւ Նոէլ Մարտիրոսեանը:
Բարեգործական տօնավաճառին հասոյթը պիտի փոխանցուի Լեհաստանի մէջ գործող շարք մը բարեգործական, հասարակական եւ կրթական կազմակերպութիւններու»:
