Հայաստանի տնտեսական զարգացման հիմնադրամը արդիւնաւէտ ձեւով կը համագործակցի Արցախի ներդրումային հիմնադրամին հետ:
Այս մասին, ըստ «Artsakhpress.am»-ի, այսօր կայացած մամուլի ասուլիսին ընթացքին ըսած է Հայաստանի զարգացման հիմնադրամի գործադիր տնօրէն Արմէն Աւագ Աւագեանը:
Անդրադառնալով այն հարցին, թէ արդիւնքներ կա՛ն Հայաստանի զարգացման հիմնադրամի եւ Արցախի մէջ արտահանումով զբաղող ընկերութիւններու միջեւ՝ Ա. Աւագեանը ըսած է, որ հիմնադրամը անընդհատ ջանքեր կը գործադրէ, որպէսզի արցախեան արտահանող ընկերութիւնները մասնակցին միջազգային ցուցահանդէսներուն: Մասնաւորապէս, ըստ անոր, վերջերս կայացած «World food» միջազգային ցուցահանդէսին մասնակցած 16 ընկերութիւններէն չորսը եղած է Արցախէն:
Խօսելով արցախեան ապրանքանիշներու միջազգային ճանաչելիութեան բարձրացման ուղղութեամբ նախատեսուող ծրագիրներուն մասին՝ հիմնադրամի տնօրէնը մանրամասնած է, որ իրենք Արցախի Հանրապետութեան կառավարութեան հետ կը համագործակցին Արցախի մէջ արտադրուած ապրանքներուն համար վաճառանիշ ստեղծելու ուղղութեամբ, որ պիտի օգտագործեն բոլոր արտադրողները:
