Հաւաքական անվտանգութեան պայմանագրի կազմակերպութեան անդամ պետութիւններու (ՀԱՊԿ) ղեկավարները հանդէս եկած են համատեղ յայտարարութեամբ, ուր իրենց աջակցութիւնը յայտնած են ԵԱՀԿ Մինսկի խումբի համանախագահներու` Լեռնային Ղարաբաղի հակամարտութեան կարգաւորման ուղղուած ջանքերուն: Այս մասին կը տեղեկացնէ ՀԱՊԿ-ի պաշտօնական կայքը:
«ԵԱՀԿ Մինսկի խումբի համանախագահութիւնը` ի դէմս Ռուսիոյ Դաշնութեան, Ֆրանսայի եւ Միացեալ Նահանգներու, միջազգային հանրութեան համապատասխան իրաւագիր ունեցող միակ կառոյցն է, որուն առաքելութիւնն է աջակցութիւն ցուցաբերել քաղաքական-դիւանագիտական ուղիներով ԼՂ հակամարտութեան կարգաւորման»,- նշուած է ՀԱՊԿ յայտարարութեան մէջ:
Նաեւ կ’ըսուի, որ ՀԱՊԿ անդամ պետութիւնները աջակցութիւն կը ցուցաբերեն ԵԱՀԿ Մինսկի խումբի համանախագահող երկիրներու հակամարտութեան կարգաւորման ուղղուած ջանքերուն, մասնաւորապէս միջազգային իրաւունքի սկզբունքներու եւ չափանիշներու, ՄԱԿ-ի Կանոնադրութեան դրոյթներու, ինչպէս նաեւ Հելսինկեան Եզրափակիչ ակտի հիման վրայ, որոնք մասնաւորապէս կը վերաբերին ուժի կամ ուժի սպառնալիքի չկիրառման, տարածքային ամբողջականութեան եւ ժողովուրդներու ինքնորոշման իրաւունքին:
«Կ’աջակցինք այն համաձայնութիւններու իրականացման, որոնք ձեռք բերուած են ԼՂ հակամարտութեան կարգաւորման վերաբերեալ 2016-2017 Վիեննայի, Ս. Փեթերսպուրկի եւ Ժընեւի մէջ գագաթնաժողովներու ծիրէն ներս եւ որոնք ուղղուած են թոյլ խուսափելու իրավիճակի սրացումէն, պահպանելու հրադադարը, հակամարտութեան գօտիին վրայ լարուածութիւնը տկարացնելու ուղղութեամբ յաւելեալ միջոցներու ձեռնարկելու եւ բանակցային գործընթացը անմիջականացնելու»,- կը նշուի յայտարարութեան մէջ:
