Իրանէն այս տարուան առաջին ութ ամսիներուն 250 միլիոն խմ իրանական կազ արտահանուած է Հայաստան, մինչեւ տարեվերջ կ՛ենթադրուի, որ կազի արտահանման ծաւալը հասնի 360 միլիոն խմ-ի:
ֆէյսպուքեան իր էջին մէջ նման թիւեր հրապարակած է իրանագէտ Արմէն Իսրայէլեանը ու մանրամասնած, որ մօտաւորապէս նոյն քանակի կազ արտահանուած է նաեւ նախորդ տարի:
«Իրան-Հայաստան կազատարի կառուցման վերաբերեալ առաջին համաձայնագիրը ստորագրուած է 1992-ին, 1995-ին լրացումներ կատարուած են: 2007-ին կազամուղի շահագործումէն ետք «կազ ելեկտրականութեան դիմաց» ձեւաչափով իրանական կազի լիարժէք արտահանումը սկսած է իրականացուիլ 2009 թուականին:
2018-ին երրորդ ելեկտրահաղորդման գիծի լիարժէք շահագործումէն ետք կը նախատեսուի երեք անգամ մեծցնել իրանական կազի ներմուծման ծաւալները»,- կը յիշեցնէ Իսրայէլեան:
Անոր ներկայացուցած տուեալներուն համաձայն՝ Իրանի մէջ կազի արտադրութեան եւ սպառման օրական ծաւալը կը կազմէ 700 միլիոն խմ: Իրանի քաղաքային շրջաններու բնակչութեան 97 տոկոսը կ՛օգտուի կապոյտ վառելիքէն, որ կը կազմէ շուրջ 16 միլիոն բաժանորդ, իսկ գիւղական վայրերուն մէջ` 4 միլիոն բաժանորդ, այսինքն` գիւղաբնակ բնակչութեան 67 տոկոսը:
Իրան կը նախատեսէ մինչեւ 2025 թուականը կազի օրական արտադրութեան ծաւալը հասցնել 1 միլիառ 200 միլիոն խմ-ի: Բացի Հայաստանէն` Իրան կազ կ՛արտահանէ նաեւ Թուրքիա` օրական 30 միլիոն խմ ծաւալով:
