Ուրբաթ, 19. 07. 2024

spot_img

Գրական Ներկայացում. Խորհրդահայ Չափածոն

*ԱՐԱ ԱՀԱՐՈՆԵԱՆ*
«Զարթօնք»ի Երէց Աշխատակից

Ուրբաթ, 17 Նոյեմբերի երեկոյեան, Կլենտէյլի կեդրոնական գրադարանի հանդիսասրահը ժամադրավայրն էր գրասէր ընտրանիի մը, որ եկած էր` ներկայ գտնուելու Լոս Անճելըսի ԹՄՄի կազմակերպած գրական ներկայացման։ Միջոցառումը ընթացք առաւ մասնաճիւղի փոխ ատենապետ Բարսեղ Գարթալեանի բացման խօսքով, որ պատրաստուած հակիրճ նախաբանով մը շեշտեց կարեւորութիւնը խորհրդահայ չափածոյին ու անոր բերած նպաստը արեւելահայ գրականութեան մէջ։ Ապա Գարթալեան հանգամանօրէն ներկայացուց միջոցառման զեկուցաբեր Դոկտ. Գառնիկ Գալստեանը՝ նշելով նաեւ գաղութէս ներս անոր ունեցած տասնամեակներու գործունէութիւնը, ինչպէս նաեւ անոր հրատարակած գրական հատորին «ԹՄՄ Հայկաշէն Ուզունեան» գրական մրցանակին արժանանալը 2007 թուականին։ Դոկտ. Գալստեան համառօտ, բայց խնամուած ներկայացումը հրամցուց ներկաներուն՝ ի մասնաւորի անդրադառնալով խորհրդային շրջանին Հայաստանի մէջ կազմաւորուած գրական կառոյցներուն եւ հրատարակութեանց։ Ան յատկապէս նշեց անունները խորհրդային շրջանի չափածոյի տիտաններուն, որոնք արեւելահայ գրականութեան մէջ պիտի մնան իրենց բերած անփոխարինելի վաստակով: Համօ Սահեան, Յովհաննէս Շիրազ, Գէորգ Էմին, Սիլվա Կապուտիկեան եւ Պարոյր Սեւակ ներառուած էին Գալստեանի ներկայացուցած զեկուցման մէջ։

Ապա Գարթալեան հանգամանօրէն այս անգամ ներկայացուց ծանօթ հաղորդավար ու դաստիարակ-գրականագէտ Անահիտ Մարտիրոսեանը, որ իր կարգին անթերի մեկնաբանութեամբ ներկայացուց Գալստեանի նշած չափածոյի կարեւորութիւնը՝ որպէս գրական արժէք։

Պատկառելի գրական ներկայացում մըն էր կազմակերպուած միջոցառումը, որուն համար մեր պարտքն է շնորհաւորել կազմակերպիչները։

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին