Յայտնի գանատահայ բեմադրիչ Ատոմ Էգոյեան պիտի պարգեւատրուի Lifetime Achievement մրցանակով Նոյեմբեր 20-ին մեկնարկող «Հնդկաստանի միջազգային շարժանկարի փառատօն 2017»-ի (IFFI) ընթացքին:
Ըստ «Փանարմինիըն»-ի՝ հնդկական «United News» լրատուամիջոցի փոխանցմամբ, Հնդկաստանի տեղեկատՈւութեան եւ հեռարձակման նախարար Սմրիթի Իրանին իր թուիթըրեան էջին վրայ հրապարակած գրառման մէջ կը յայտնէ, որ փառատօնի ընթացքին բեմադրիչին նկարած ` «Քաղցր ապագան», «Էքզոթիքա» եւ «Յիշել» երեք շարժանկարներուն յատուկ ցուցադրութիւն պիտի կազմակերպուի:
Աշխարհահռչակ բեմադրիչ, գրող եւ արտադրող Ատոմ Էգոյեան մեծ ներդրում ունեցած է համաշխարհային շարժանկարի զարգացման գործին մէջ: Անոր ֆիլմերուն մէջ կը համադրուին բուռն զգացումներն ու արհեստագիտական ինքնատիպ լուծումները, որոնք հանդիսատեսին կը բացայայտեն տարբեր հիմնախնդիրներ: Եգիպտահայ ընտանիքի մէջ ծնած Ատոմ Էգոյեան, Թորոնթոյի համալսարանին մէջ հայոց պատմութիւն ուսանելու տարիներուն, շատ բան կը բացայայտէ իր ազգային մշակոյթի եւ պատմական անցեալի մասին: Ան մեծ հետքրքրութեամբ կը սկսի ուսումնասիրելու 1915 թուականի Հայոց Ցեղասպանութիւնը, որու ընթացքին 1.5 միլիոն հայ սպաննուած է Թուրքիոյ մէջ:
«Ան իր գործունէութեան հիմնական շարժիչ ուժը ֆիլմարտադրութեան մէջ կը համարէ մոռցուած պատմութեան վերհանումը»,- կը գրէ աղբիւրը:
Էգոյեան նկարած է 15 լիամետրաժ ֆիլմ, ստեղծած է քանի մը հեռատեսիլային նախագիծեր եւ կարճամետրաժ ֆիլմեր: Բեմադրիչին «Արարատ» ֆիլմը անոր առաջին գործն է Հայոց Ցեղասպանութեան մասին:
