Լիբանանահայ կեանքէն ներս երեւոյթ դարձած է թուականներով իրար խաչաձեւող ձեռնարկներու կազմակերպումը:
Հաւատալով, որ մեր թիւը հաշուող եւ աշխարհագրական նեղ շրջագիծի մը մէջ ապրող հաւաքականութեան մը հրամցուելիք՝ նոյն օրը զիրար խաչաձեւող ձեռնարկները կարելի է աւելի լաւ կազմակերպել եւ համակարգել, Լիբանանահայ կազմակերպութիւններու, միութիւններու եւ կրօնական ու ազգային հաստատութիւններու ներկայացուցիչներ երէկ՝ Երեքշաբթի, 21 Նոյեմբեր 2017-ի երեկոյեան, համախմբուեցան Թէքէեան Կեդրոնի մէջ` միասնաբար քննարկելու վերոյիշեալ երեւոյթին բացասական կողմերը եւ, ըստ այնմ, լուծումներ որոնելու եւ լաւագոյնին հասնելու համար:
Գործակցութեան բարձր ոգիով ընթացած հանդիպման մը ընթացքին, որուն ներկայ եղաւ նաեւ Լիբանանի մէջ ՀՀ դեսպանի ներկայացուցիչը, քննարկուեցան շատ մը գործնական կարելիութիւններ՝ նուազագոյնի իջեցնելու այս անհաճոյ պարագան, որ ո՛չ միայն նեղ կացութեան կը մատնէ պաշտօնական հիւրերն ու նոյնիսկ ձեռնարկ մը կազմակերպող կողմերը, այլ նաեւ լիբանանահայ հանդիսատեսը կը զրկէ իր տարրական իրաւունքէն՝ իր նախասիրած ձեռնարկին ներկայ գտնուելէ:
Շինիչ ու սրտբաց քննարկումները յանգեցան կարգ մը լուծումներու առաջարկման, որոնց բիւրեղացման համար, ինչպէս նաեւ հնարաւորութիւնը տալու այլ կողմերու եւս այս օգտաշատ հանդիպման միանալու, ժողովականները յարմար տեսան յաջորդ հանդիպումով մը նպատակայարմար որոշումներու յանգելու:
Յաջորդ հանդիպման թուականն ու վայրը պիտի յայտարարուի մամուլով:
