Հանդիսապետութեամբ Արամ Ա. կաթողիկոսին Կիրակի, Նոյեմբեր 19-ին, յետ սուրբ եւ անմահ պատարագին, տեղի ունեցաւ Հայ գիրքի 38-րդ համահայկական ցուցահանդէսին բացումը: Հանդիսութեան ներկայ էին Լիբանանի մէջ Հայաստանի Հանրապետութեան դեսպան Սամուէլ Մկրտչեան, ինչպէս նաեւ միաբան հայրեր, ազգայիններ, մտաւորականներ եւ ընթերցասէր հոծ բազմութիւն մը:
Բացման հանդիսութիւնը ընթացք առաւ հայրապետական թափօրով` դէպի ցուցահանդէսին տաղաւարը, ուր վեհափառ հայրապետը կատարեց պաշտօնական բացումը: Դպրեվանքի «Արմաշ» երգչախումբը ծաղկեցուց հանդիսութիւնը փունջ մը ազգային ու կրօնական երգերով:
Վեհափառ հայրապետը ողջունելէ ետք ներկաները բացուած յայտարարեց Հայ գիրքի 38-րդ համահայկական ցուցահանդէսը: Այս առիթով Արամ Ա. կաթողիկոսին Հայ գիրքին ձօնած «Լո՜յս տեսաւ…» բանաստեղծութիւնը ընթերցեցին երիտասարդ միաբաններէն Վաչէ վրդ. Պալըքճեան եւ Պսակ աբղյ. Թեփիրճեան: Քերթուածը ո՛չ միայն վեհափառ հայրապետին ներքին ապրումներուն ու հայ գիրքին հանդէպ ունեցած սիրոյ ու գուրգուրանքին արտացոլումն էր, այլ նաեւ մեր սփիւռքեան իրականութեան դրսեւորումը: Բանաստեղծական ոճով պարուրած իր տողերով, վեհափառ հայրապետը իրապաշտ կերպով կը բնութագրէ հայ գիրքին ապրած անցեալն ու ներկան: «Լո՜յս տեսաւ»-ով կը շեշտուի գիրքին եւ մանաւանդ հայ գիրքին լուսաւորման աղբիւր ըլլալը:
Հանդիսութիւնը իր աւարտին հասաւ Հայրապետական մաղթերգով եւ «Կիլիկիա» քայլերգով:
Յայտնենք, որ ցուցահանդէսը կը շարունակուի մինչեւ Դեկտեմբեր 10, առաւօտեան ժամը 9:00-էն 7:00:
