ԱԻՄ առաջնորդ Պարոյր Հայրիկեանը այսօր առաւօտէն հացադուլ սկսած է Կեդրոնական ընտրական յանձնաժողովի (ԿԸՅ) շէնքին դիմաց: Այս մասին կը հաղորդէ «Panorama.am»-ը։
Հայրիկեանը կը փափաքէր կազմակերպել ստորագրահաւաք Սահմանադրական փոփոխութիւններ կազմակերպելու համար, սակայն ԿԸՅ-էն պատասխանած են, որ Հայաստանի «հանրաքուէի մասին» օրէնքը չի նախատեսեր քաղաքացիական նախաձեռնութիւն: ԿԸՅ-ի բացասական պատասխանը պատճառ դարձած է հացադուլի դիմելու:
«Կայ սահմանադրական փոփոխութիւններ նախաձեռնելու իրաւունք քաղաքացիներու համար, բայց այդ քաղաքացիներուն թիւը պէտք է 200 հազարէն պակաս չըլլայ: Եթէ հաւաքենք պահանջուած 200.000-ը, ԿԸՅ-ն չ՝ընդունիր զանոնք այն պատճառաբանութեամբ, որ համապատասխան ձեւաթուղթի վրայ չէ արձանագրուած: Մինչ երէկ ԿԸՅ-ն մեզի ձեւաթուղթ չէ տուած, աւելին` կ՝ըսեն, որ օրէնքով այդպիսի իրաւունք չկայ: Հացադուլով ես շեշտադրած եմ մեր բողոքը ուղղուած յանձնաժողովի հակասահմանադրական գործողութիւններուն դէմ»,- ըսած է Հայրիկեանը:
