Հինգշաբթի, 25. 07. 2024

spot_img

«Յակոբ Պօղոսեանի Անուան Կրթաթոշակ» Շարադրութիւններու Ամէնամեայ Մրցոյթը

Երեւանի «Թէքէեան Կեդրոն» Հիմնադրամի կազմակերպութեամբ, դարձեալ կայացաւ «Յակոբ Պօղոսեանի անուան կրթաթոշակ» շարադրութիւններու ամէնամեայ մրցոյթը՝ նուիրուած հայ ականաւոր լրագրող, հրապարակախօս, քաղաքական մեկնաբան, թարգմանիչ Յակոբ Պօղոսեանի յիշատակին:

Յակոբ Պօղոսեան ծնած է Լիբանան 1936ին: Յաճախած է Հայ Կաթողիկէ Մեսրոպեան եւ ՀԲԸՄ Յովակիմեան-Մանուկեան վարժարանները: Բարձրագոյն կրթութիւնը ստացած է Պէյրութի Ամերիկեան համալսարանին մէջ, այնուհետեւ աւարտած է Լոնտոնի համալսարանի միջազգային լրագրութեան բաժնի դասընթացքները: Դաստիարակուած է հայկական ոգիով, հայրենասիրութեամբ ու սիրով դէպի ազգային մշակոյթն ու լեզուն: Կանուխ հասակէն գիտակցած է հայու ինքնութեան պահպանման կարեւորութիւնը եւ ուսանողական տարիներէն ի վեր բեղուն, ազգանուէր գործունէութիւն ծաւալել լիբանանահայ համայնքի հասարակական կեանքին մէջ: Աշխատած է «Յառաջ», «Յառաջ Գրական», «Զարթօնք» թերթերուն մէջ: 1989ին ընտանիքով տեղափոխուած է Միացեալ Նահանգներ եւ շուտով ստանձնած Քալիֆորնիայի «Նոր Օր» թերթի գլխաւոր խմբագրի պաշտօնը: Եղած է նաեւ ՀԲԸՄ Քալիֆորնիայի յանձնաժողովի վարիչ-քարտուղարը։ Արժանացած է ԹՄՄ «Ռիթա եւ Վարդգէս Պալեան» մամլոյ մրցանակին: Կեանքէն հեռացած է  2001 թուականին :

Շարադրութիւններու մրցոյթը, զոր նախաձեռնած եւ 2002ին. սկսած իրականացուցած է Յակոբ Պօղոսեանի այրին՝ ԱՄՆ բնակող Անի Պօղոսեանը, նպատակ ունի նպաստելու աշակերտներու յառաջադիմութեան, խրախուսելու հայոց լեզուի իմացութիւնն ու ստեղծագործական աշխատանքը, ինչպէս նաեւ առողջ մրցակցութեան պարագաներուն հնարաւորութիւն տալու պատանիներուն դրսեւորել իրենց գիտելիքները:

Երեւանի Վ. Թէքէեանի անուան թիւ 92 դպրոցին մէջ՝ Յակոբ Պօղոսեանի անունը կրող լսարանին մէջ, կայացաւ ամէնամեայ ձեռնարկի արդիւնքներուն ամփոփումը: Մրցոյթը կայացած էր  8 Հոկտեմբերին 2017ին Թէքէեան Կեդրոնին մէջ: Այս տարուան ստեղծագործական շարադրութիւններու թեմաներն էին՝ «Խաղաղ երկինք» եւ «Երազի թեւերով»: Մրցոյթի մասնակիցներն էին դպրոցի 8-րդ դասարանի աշակերտները: Բոլորն ալ արժանացան խրախուսական մրցանակներու՝ Յակոբ Պօղոսեանի անուան կրթաթոշակին:

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին