Ռուսիոյ արտաքին գործոց նախարար Սերկէյ Լաւրով յայտնած է, որ մտադիր է յաջորդ շաբթուան սկիզբը այցելել Հայաստան եւ Ատրպէյճան, կը հաղորդէ «ԹԱՍՍ»-ը:
«Յաջորդ շաբթուան ճիշդ սկիզբը ծրագրած եմ իմ այցելութիւններս Երեւան եւ Պաքու: Նախ եւ առաջ, այդ այցելութիւնները նախատեսուած է իրականացնել Ռուսիոյ եւ համապատասխանաբար Հայաստանի ու Ատրպէյճանի հետ դիւանագիտական յարաբերութիւններու հաստատման 25-ամեակին ընդառաջ»,- ըսած է ան:
«Օրակարգի վրայ պիտի ներառուին այդ երկիրներէն իւրաքանչիւրին հետ երկկողմանի յարաբերութիւններու հարցերը: Պիտի խօսինք շրջանային եւ միջազգային խնդիրներու շուրջ, պիտի փորձենք հասկնալ, թէ Հայաստանի եւ Ատրպէյճանի նախագահներու վերջին հանդիպումէն ետք ղարաբաղեան տագնապի լուծման ջանքերուն ծիրին մէջ ո՛ր փուլին մէջ կը գտնուինք»,- յայտնած է Լաւրով:
