Արցախի Հանրապետութեան իշխանութիւններուն հետ ձեռք բերուած պայմանաւորուածութեան համաձայն` Նոյեմբեր 8-ին ԵԱՀԿ առաքելութիւնը Արցախի եւ Ատրպէյճանի զինուած ուժերու սահմանագիծին վրայ ծրագրուած դիտարկում իրականացուցած է Մարտակերտ քաղաքէն դէպի հիւսիս:
Ինչպէս կը տեղեկացնէ Արցախի արտաքին գործոց նախարարութեան տեղեկատուական վարչութիւնը, Արցախի Հանրապետութեան պաշտպանութեան բանակի դիրքերէն դիտարկումը իրականացուցած են ԵԱՀԿ գործող նախագահի անձնական ներկայացուցչի (ԳՆԱՆ) դաշտային օգնականներ Կենատիէ Փեթրիքան (Մոլտովա) եւ Օգնեն Եովիչ (Պոսնիա եւ Հերցեկովինա):
Շփման գիծի հակառակ կողմէն դիտարկումը իրականացուցած են ԵԱՀԿ ԳՆԱՆ դաշտային օգնական Միխայիլ Օլարուն (Մոլտովա) եւ ԳՆԱՆ գրասենեակի աշխատակից Մարթին Շուսթըր (Գերմանիա):
Դիտարկումը անցած է ըստ նախատեսուած ժամանակացոյցի, սակայն ատրպէյճանական կողմը ԵԱՀԿ-ի առաքելութիւնը չէ տարած յառաջապահ դիրքեր:
Դիտարկման առաքելութեան արցախեան կողմէ ուղեկցած են Արցախի Հանրապետութեան արտաքին գործոց նախարարութեան եւ պաշտպանութեան նախարարութեան ներկայացուցիչները:
