Գրող եւ գինիի սիրահար Հենրի Ճեֆրիս վերջերս Հայաստան կատարած այցի ընթացքին բացայայտած է Հայաստանի գինեգործական հարուստ աւանդոյթները:
Ըստ «Փանարմինիըն»-ի՝ The Spectator-ի մէջ հեղինակը պատմած է հայկական գինիի պատրաստութեան հնագոյն արհեստագիտութեան մասին: «Վայոց ձորի մարզին մէջ` դէպի Իրան տանող մայրուղիի իւրաքանչիւր 100 մեթրի վրայ լոլիկ, ձմերուկ եւ Coca-Cola կը վաճառեն: Երբ կը մօտենաս, կը պարզուի, որ, խորամանկօրէն, Coca-Cola-ի շիշերու մէջ լեցուած է կարմիր գինի, որ աննկատ կը տեղփոխուի Իրան»,- կը գրէ հեղինակը:
Վայոց ձորի մէջ գրողը համտեսած է խաղողի տարբեր տեսակներէ պատրաստուած հայկական գինի: «Զորիկ եւ Երազ Ղարիբեանները գինին կը պատրաստեն միեւնոյն` խաղողի արենի տեսակէն, սակայն կը ստանան բոլորովին տարբեր համ ունեցող գինիներ: Գինիի համտեսի մօտակայ «Զորահ» սրահին մէջ մատուցուող կարմիր «Կարաս» գինին Լոնտոնի խանութներուն մէջ կը վաճառուի £25 –ի»,- կը գրէ Հենրի Ճեֆրիս:
«Զորաh»-ի երկու հիմնադիրներն ալ` Զորիկն ու Երազը, Սփիւռքահայեր են: Անոնք կը ցանկային խաղողի այգիներ ձեռք բերել Իտալիոյ Տոսքանա նահանգին մէջ, սակայն 1998-ին հայրենիք այցէն ետք, որոշեցին գինեգործութեամբ զբաղիլ Հայաստանի մէջ:
