Եւրոմիութեան հետ համաձայնագրին մէջ Մեծամօրի հիւլէակայանի փակման հետ առնչուած որեւէ կէտ չկայ: Այս մասին յայտարարած է նախագահ Սերժ Սարգսեան «Ռիա նովոսթի» գործակալութեան տուած հարցազրոյցի ընթացքին:
Նախագահը այս ձեւով պատասխանած է լրագրողին այն հարցումին թէ Եւրոմիութեան հետ համաձայնագրին մէջ Մեծամօրի հիւլէակայանի փակման հետ առնչուած ինչ, որ բան կայ:
«Այդ քննարկումները արհեստականօրէն կը շրջանառուին եւ իրականութեան հետ ոչ մէկ կապ ունին: Եւրոմիութեան հետ համաձայնագրի նախագիծին մէջ այս պարբերութիւնը ձեւակերպուած է լռելեայն (նկատի ունենալով Մեծամօրի շահագործման առարկայական ժամկէտը): 2014-ին Հայաստանի կառավարութիւնը որոշած է հիւլէակայանի շահագործման ժամկէտը երկարաձգել: Կայանի շահագործման ժամկէտի երկարաձգման ֆինանսաւորումը պիտի իրականացուի ռուսական պետական արտահանման` 270 միլիոն տոլար վարկի եւ 30 միլիոն տոլար դրամաշնորհի հաշուին: Ներկայիս «Ռոսաթոմ» պետական ընկերութեան հետ կը շարունակուին աշխատանքները հիւլէակայանի երկրորդ պլոքի շահագործման ժամկէտը երկարացնելու ուղղութեամբ: Կարեւոր է նշել, որ հիւլէակայանը կը գործէ Մագատ-ի չափանիշներուն համապատասխան եւ ատիկա միջազգային մասնագիտացուած գործակալութիւններու եզրակացութիւնն է: Միջոցներ կը ձեռնարկուին ծրագրի եւ գործառնական անվտանգութեան բարձրացման, ինչպէս նաեւ արդիականացման ուղղութեամբ: Այնպէս որ, Մեծամօրը առնուազն մինչեւ 2027-ը պիտի գործէ: Մենք կը հաւատանք, որ մեր անվտանգութեան համար, առաջին հերթին ուժանիւթը, հիւլէական ուժանիւթը պէտք է միշտ առկայ ըլլայ Հայաստանի մէջ»:
Այն հարցին, թէ արդեօք կարելի՛ է Նոյեմբերին՝ Եւրոմիութեան հետ համաձայնագրի կնքումէն ետք, անոր փակման մասին խօսք ըլլայ, ՀՀ նախագահը պատասխանած է. «Ո՛չ , համաձայնագրի մէջ նման կէտ չկայ»:
