«Փորձած ենք 2018 թուականի պիւտճէն նախագծել մէկ ընդհանուր կանոնով` կայուն, երկարաժամկէտ տնտեսական աճով»,- այսօր` ըստ «Երկիրմեդիա»-ի՝ Հայաստանի 2018-ի պետական ամավարկի (պիւտճէ) մասին օրէնքի նախագիծի նախնական քննարկման ժամանակ ըսած է ՀՀ երեւմուտքի նախարար Վարդան Արամեան:
Անոր խօսքով` 2017 թուականին տնտեսական աճ արձանագրուած է արդիւնաբերութեան ծառայութիւնները եւ առեւտուրը. «Սա մեզի հիմք կու տայ 2017-ի համար ակնկալելու 4-4.3 տոկոսի իրական տնտեսական աճ: 2017-ին կը կանխատեսենք քիչ մը աւելի բարձր տնտեսական աճ, քան նախատեսուած էր 2017-ի պիւտճէի նախագիծով, ուր դրուած էր 3.2 տոկոս տնտեսական աճի ցուցանիշ»:
Վարդան Արամեան շեշտած է, որ այս տարի զբօսաշրջութեան ոլորտին մէջ աննախադէպ աճ արձանագրուած է` 30 տոկոսէն բարձր:
Ինչ կը վերաբերի 2018-ին, ապա նախարարը ըսած է, կ՛ակնկալուի, որ տնտեսական աճը ըլլայ 4.5 տոկոսի շրջանակներուն մէջ:
«Հիմնական ներդրումները պիտի ըլլան արդիւնաբերութեան ոլորտին, ծառայութիւններու մասով եւս կ՛ակնկալենք յառաջընթացի շարունակութիւն: Կ՛ակնկալուի, գիւղատնտեսութիւնն ու շինարարութիւնը որոշ վերականգնման նշաններ ցոյց տան: Գիւղատնտեսութեան կարողական աճը կը գնահատուի 3-4 տոկոս»,- ըսած է Վարդան Արամեան:
Երեւմուտքի նախարարը աւելցուցած է, որ տնտեսական կայուն աճի համար կարեւոր է նաեւ պետական պարտքի կայունացումը: Ան նշած է, որ կառավարութիւնը փորձած է ներկայացնել այնպիսի ամավակ, որ 2018-ին հնարաւորութիւն կ՛ընձեռէ պետական պարտք-ՀՆԱ ցուցանիշը 1 տոկոսով նուազեցնել:
«2018-ին կը կանխատեսուի արտահանման` 8.0 տոկոս, ներմուծման` շուրջ 7.8 տոկոս իրական աճ: Ինչ կը վերաբերի արտաքին ապրանքաշրջանառութեան, ապա ներմուծումը պիտի շարունակի աճիլ` կազմելով շուրջ 10 տոկոս: 2018 թուականին` գործընկեր երկիրներու տնտեսական աճին եւ ՀՀ կառավարութեան կողմէ տնտեսութեան արտահանելի ոլորտին մէջ վարուող քաղաքականութեան ուղղութեան համահունչ, կը կանխատեսուի արտահանման շուրջ 11.5 տոկոս աճ»,- ներկայացուցած է Արամեան:
Ան յայտնած է, որ կ՛ակնկալուի` 2018-ի ամավարկի եկամուտներ/ՀՆԱ յարաբերակցութիւնը պիտի կազմէ 22.3 տոկոս` 2017-ի համար հաստատուած եւ 2016-ի փաստացի 22.4 տոկոսի դիմաց:
«Օտարերկրեայ պետութիւններէն եւ միջազգային կազմակերպութիւններէն պիւտճէի նախագիծով 2018-ին կ՛ակնկալուի ստանալ 35,6 միլիառ դրամի պաշտօնական դրամաշնորհներ, իսկ այլ եկամուտներու գծով մուտքերը ծրագրուած են 23.8 միլիառ դրամի չափով: 2018-ի պետական պիւճէի նախագիծով ծախսերուն ծաւալը ծրագրաւորուած է շուրջ 1,464.2 միլիառ դրամ»,- ըսած է ան:
