Արցախի Հանրապետութեան արտաքին գործոց նախարարութեան մամլոյ ծառայութեան հաղորդումով` ՄԱԿ-ի շարք մը հիմնարար փաստաթուղթերու համաձայն, միջազգային հանրութիւնը յանձնառութիւն ստանձնած է` խրախուսելու ժողովուրդներու ինքնորոշման իրաւունքի գործադրումը եւ յարգելու այդ իրաւունքը:
Արտաքին գործոց նախարարութեան հաղորդագրութեան մէջ նշուած է. «Կարեւոր կը նկատենք, որ Պարսելոնայի եւ Մատրիտի միջեւ քաղաքական ճգնաժամի հանգուցալուծումը գտնուի բացառապէս խաղաղ միջոցներով եւ երկխօսութեան ճամբով:
Այս առնչութեամբ անհրաժեշտ է յիշեցնել, որ Ազրպէյճանի հրաժարիլը` ճանչնալ Արցախի ժողովուրդի ինքնորոշման իրաւունքը, եւ պաշտօնական Պաքուի կողմէ քաղաքական հարցերու լուծման համար ուժային մեթոտներու կիրարկումը ղարաբաղեան տագնապը տեղափոխեցին զինուորական հարթութիւն:
«Անհերքելի է Քաթալոնիոյ ժողովուրդի` իր քաղաքական կարգավիճակը ժողովրդավարական կամքի արտայայտութեան միջոցով ինքնուրոյն որոշելու իրաւունքը», կը նշէ արտաքին գործոց նախարարութիւնը:
Արցախը կ՛ողջունէ որեւէ ժողովուրդի ինքնորոշումը եւ յոյս ունի, որ Քաթալոնիոյ շուրջ ստեղծուած իրավիճակը խաղաղ լուծում կ՛ունենայ: Այս մասին «Ռիա Նովոսթի»-ի հետ զրոյցի մը ընթացքին ըսած է Արցախի նախագահի մամլոյ քարտուղար Դաւիթ Բաբայեան:
«Մենք կ՛ողջունենք որեւէ ժողովուրդի ինքնորոշումը, սակայն կը կարծենք, որ ամէն ինչ պէտք է խաղաղ ճամբով կատարուի: Մենք դէմ ենք արիւնահեղութեան, քանի որ մենք ալ անցած ենք անկէ եւ գիտենք, թէ ի՛նչ կը նշանակէ ատիկա: Սակայն այն, որ որեւէ ժողովուրդ ինքնորոշման իրաւունք ունի եւ պէտք է օգտուի ատկէ, եթէ ցանկութիւնը ունի, միջազգային իրաւունքի հիմնարար սկզբունքն է», նշած է Բաբայեան:
Անոր համաձայն, ստեղծուած իրավիճակէն կրնայ երեք ելք ըլլալ` Մատրիտը ճանչնայ Քաթալոնիոյ ժողովուրդին կամքի արտայայտութիւնը, աշխատի ուժի ճամբով թոյլ չտալ ատիկա, սպանական պետութիւնը վերածուի դաշնակցային պետութեան կամ համադաշնակցութեան: «Քաթալոնիան եւ Սպանիան շատ ընդհանուր բան ունին` լեզուն, մշակոյթը, պատմութիւնը: Ասիկա Ազրպէյճանի եւ Արցախի դէպքը չէ: Ամէն պարագայի` ուժային գործողութիւնները պիտի յանգեցնեն անկանխատեսելի հետեւանքներու», ըսած է Արցախի նախագահի մամլոյ բանբերը:
Բաբայեան ըսած է, որ Արցախի, ինչպէս նաեւ ամբողջ աշխարհի մէջ, ուշադիր կը հետեւին Քաթալոնիոյ մէջ ստեղծուած իրավիճակին:
