Ամենայն Հայոց Կաթողիկոսը, ԱՄՆ Հայոց Արեւմտեան թեմ հայրապետական այցելութեան ծիրէն ներս՝ Հոկտեմբեր 26-ին, այցելած է «Վաչէ Մանուկեան» դպրոց եւ հանդիպած աշակէտութեան հետ:
Մայր Աթոռի տեղեկատուական համակարգի փոխանցմամբ, նոյն օրը Վեհափառ Հայրապետը այցելած է «Արարատ տուն», ուր կը խնամուին հայ տարեցներ: Ան իր գնահատանքնը յայտնած է հաստատութեան Խնամակալ մարմնին, աշխատակիցներուն, Հայրապետական օրհնութիւն ու բարեմաղթանքներ փոխանցած է տարեցներուն:
Հայոց Հայրապետը խնամատար հաստատութեան նուիրած է՝ Գէորգ Սուրէնեանցի «Տիրամօր» սրբապատկերի կրկնօրինակը: Այնուհետ Նորին Սրբութեան ձեռամբ կատարուած է «Արարատ տան» նոր մասնաշէնքի յուշաքարի օրհնութեան արարողութիւնը:
Երեկոյեան, Սրբոց Ղեւոնդեանց առաջնորդանիստ մայր եկեղեցւոյ մէջ տեղի ունեցած է «Հրաշափառ»ի արարողութիւն: Հաւատաւոր ժողովուրդին ուղղուած խօսքին մէջ, ան իր շնորհաւորանքներն ու բարեմաղթանքները յայտնած է թեմի հաստատման 90-ամեակի առիթով` գնահատելով ամերիկահայութեան ձեռքբերումներն ու յաջողութիւնները համայնքի ազգային-եկեղեցական կեանքին մէջ:
Վեհափառ Հայրապետը ամերիկաբնակ հայորդիներուն մաղթած է Աստուծոյ ամենառատ շնորհներն ու օրհնութիւնները` յորդորելով, որ աստուածահաճոյ կեանքով, անսպառ եռանդով, ազգային ու հոգեւոր կեանքի բարօրութեան ու պայծառութեան տեսլականով շարունակեն եկեղեցաշէն ու ազգօգուտ գործերը: «Հրաշափառ»-ի արարողութենէն ետք հաւատացեալները մօտեցած են Հայրապետի Աջը համբուրելու եւ Նորին Սրբութեան օրհնութիւնը ստանալու:
