Շաբաթ եւ Կիրակի, 2-3 Սեպտեմբեր 2017-ին, Սեն Ճոզէֆի սկաուտութեան երէցական խումբը կազմակերպեց համալիբանանեան տարողութեամբ երկօրեայ Ռալի մը, որուն մասնակցեցան լիբանանեան 15 սկաուտական խումբեր:
Ռալին սկսաւ Շաբաթ առաւօտեան ժամը 8-ին: Ռալիին մասնակցելու հրաւէր ստացած էին ՀԵԸ Անդրանիկ Անթիլիասը եւ ՀԵԸ Անդրանիկ Սեւանը: Մեր զոյգ սկաուտական խումբերէն՝ խմբապետական կազմի անդամներ, ինչպէս նաեւ երէցներ եւ քառավելներ լաւագոյնս դրսեւորեցին ՀԵԸ-ի սկաուտական դպրոցի աւանդութիւնները:
Իւրաքանչիւր մասնակցող սկաուտական խումբ առանձնաբար պիտի ունենար շարժական եւ աշխատանքային ենթախումբեր: Աշխատանքային խմբակը պիտի օգնէր ինքնաշարժով շրջող իր խմբակիցներուն:
ՀԵԸ –Անդրանիկ Անթիլիասի շարժական խումբը կը բաղկանար եօթ անձերէ: Գալով աշխատանքային խմբակին, սկաուտական շարժումի քսանէ աւելի անդամ-անդամուհիներ, նոյնիսկ՝ արենուշներ, սկաուտներ, ՀԲԸՄ-ի Տեմիրճեան կեդրոնէն հետեւեցան Ռալիի ընթացքին եւ շնորհիւ իրենց կազմակերպուած խմբային աշխատանքին,առաւելագոյն չափով օգնեցին շարժականի իրենց ենթախմբակիցներուն: ՀԵԸ Անդրանիկ Սեւանի շարժական խումբը կ’ընդգրկէր հինգ անձ: Անոնց աշխատանքային խումբը ՀԲԸՄ-ՀԵԸ-ի Զապէլ Մովսէսեան կեդրոնէն կը հետեւէր Ռալիին:
Սկզբունքով, ինքնաշարժով շրջող խմբակը իրեն յղուած հարցումները կը ղրկէր աշխատանքային խմբակին: Այս վերջինիս մաս կազմողները համացանցի միջոցով կը յայտնաբերէին հարցումին պատասխանը եւ կը փոխանցէին շարժական խումբի իրենց խմբակիցներուն: Հարցարաններուն կողքին, Ռալիի մասնակցողներուն առջեւ առկայ էին ֆիզիքական մարտահրաւէրներ, ինչպէս՝ լողալ, լեռ մագլցիլ եւ այլն: Շարժական խմբակները շրջեցան Լիբանանի գրեթէ բոլոր կողմերը՝ Էհտին, Պեքաա, Պշարի, Մէյրուպա,Էնֆէ, Միզիարա, Լաքլուք, Հատատ էլ Ժեպէ…: Շուրջ քսանհինգ տարբեր շրջաններ:
Միւս կողմէ, Ռալի ին կազմակերպիչները յատուկ բարենիշերով գնահատեցին սկաուտական այն խումբերը, որոնք կամաւորաբար ընդառաջեցին մարդասիրական Donner Sang Compter-ի կազմակերպած արեան հանգանակութեան արշաւը: ՀԵԸ Անդրանիկ Անթիլիասի վեց անձեր մասնակցեցան արեան տուչութեան:
Շարժական բոլոր խումբերը Շաբաթ օր գիշերեցին միեւնոյն վայրին մէջ: Իսկ աշխատանքային խումբերը, ՀԵԸ-ի պարագային՝ ՀԲԸՄ-ի Տեմիրճեան եւ ՀԲԸՄ-ՀԵԸ-ի Զապէլ Մովսէսեան կեդրոններուն մէջ:
Կիրակի առաւօտեան ժամը 8-ին Ռալիին վերսկսաւ եւ աւարտեցաւ երեկոյեան ժամը 9-ին: Բոլոր մասնակիցները համախմբուած էին Սեն Ճոզէֆ, իրազեկ դառնալու երկօրեայ Ռալիի արդիւնքներուն: Առաջին եւ երկրորդ դիրքերը գրաւեցին Սեն Ճոզէֆը ներկայացնող խումբերը: ՀԵԸ Անդրանիկ Անթիլիաս մասնակցող 15 խումբերուն մէջ գրաւեց երրորդ պատուաբեր դիրքը: ՀԵԸ Անդրանիկ Սեւան չորրորդ հանդիսացաւ:
Արդիւնքները գնահատելի էին մեր զոյգ սկաուտական միաւորներուն համար, նկատի ունենալով որ անոնք առաջին անգամ ըլլալով կը մասնակցէին նման տարողութեամբ Ռալիի մը:
ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ
