Երէկ ամբողջացաւ Հայաստանի Երրորդ Հանրապետութեան Անկախութեան հռչակագիրի 27 ամեակը: Արդարեւ, 23 Օգոստոս 1990-ին Հայկական ԽՍՀ Գերագոյն խորհուրդի առաջին նստաշրջանին ընդունուեցաւ հռչակագիր Հայաստանի անկախութեան մասին։
Անոր նախաբանին մէջ յիշուեցաւ. Հայկական ԽՍՀ Գերագոյն խորհուրդը, արտայայտելով Հայաստանի ժողովուրդի միասնական կամքը, ելլելով Մարդու Իրաւունքներու Միջազգային Հռչակագիրի սկզբունքներէն եւ միջազգային իրաւունքի հանրաճանաչ նորմերէն, կենսագործելով ազգերու ազատ ինքնորոշման իրաւունքը, հիմնուելով 1 Դեկտեմբերի 1989-ի «Հայկական ԽՍՀ-ի եւ Լեռնային Ղարաբաղի վերամիաւորման մասին» Հայկական ԽՍՀ Գերագոյն խորհուրդի եւ Լեռնային Ղարաբաղի Ազգային խորհուրդի համատեղ որոշման վրայ, զարգացնելով 28 Մայիս 1918-ին ստեղծուած անկախ Հայաստանի Հանրապետութեան ժողովրդավարական աւանդոյթները, խնդիր դնելով ժողովրդավարական, իրաւական հասարակարգի ստեղծումը, կը հռչակէ անկախ պետականութեան հաստատման գործընթացի սկիզբը:
