«Արմենփրես» լրատուական գործակալութիւնը, Beeline-ը եւ Տեխնոլոգիական զարգացման կեդրոն հիմնադրամը ազդարարած են «Արմենփրես. Պատմութիւն» նախագիծի ծիրէն ներս «history.armenpress.am» կայքի գործարկման մասին:
«Արմենփրես» լրատուական գործակալութեան տնօրէն Արամ Անանեան ըսած է, որ «Արմենփրես. Պատմութիւն» նախագիծը հնարաւորութիւն կու տայ թերթելու պատմութեան էջերը, տեսնելու, թէ ինչ զարգացումներ տեղի ունեցած են:
«Ներկայիս 10 հազար լուսանկար հրապարակելով, իսկ յետագային ատոնց թիւը աւելցնելով` մենք ցոյց կու տանք, որ գործակալութիւնը եղած է եւ կը մնայ ժամանակակից Հայաստանի կարեւոր իրադարձութիւններու լուսաբանողը»,- ըսած է Անանեան:
Կայքը նաեւ հնարաւորութիւն կու տայ լուսանկարները տարածել ընկերային կայքերու եւ այլ հարթակներու մէջ: Անիկա հասանելի է համակարգիչներու եւ բջիջային սարքերու միջոցով:
Թուայնացման եւ կայքի ստեղծման աշխատանքները իրականացուցած է Տեխնոլոգիական զարգացման կեդրոն հիմնադրամը: Արդէն իրականացուած է թուայնացում մօտ 6500 լուսանկարի, որոնցմէ մօտ 2500-ը արդէն իսկ հրապարակուած են կայքին մէջ:
Թուայնացուած բոլոր լուսանկարներու օգտագործման, ինչպէս նաեւ հեղինակային եւ յարակից իրաւունքները կը պատկանին միայն «Արմենփրես» լրատուական գործակալութեան:
