Ինչպէս նշած էինք, Լիբանան իր այցելութեան վերջին օրը՝ Ուրբաթ 14 Յուլիս 2017-ին Լիբանանի մէջ Հայաստանի Հանրապետութեան դեսպանատան մէջ ՀՀ Սփիւռքի նախարար Հրանոյշ Յակոբեան պարգեւատրեց կրթական եւ հասարակական ոլորտի լիբանանահայ գործիչներ: Պարգեւատրումին ներկայ էին, լիբանանահայ ազգային, կրթական հաստատութիւններու եւ լրատուական կառոյցներու ներկայացուցիչներ:
Պարգեւատրուողներուն շարքին էր (որոնց մասին յաջորդաբար կ՛անդրադառնանք) լիբանանահայ գործարար եւ բարերար Տիար Հրայր Տանձիկեան, որ տասնեակ տարիներու ընթացքին Հայաստան-Սփիւռք գործակցութեան մէջ նշանակալի ծառայութիւններ մատուցելուն համար, որպէս բարերար, գործունէայ ազգային, համայնքային, հասարակական գործիչ, եւ մշտապէս աջակցող Լիբանանի մէջ ՀՀ դեսպանութեան ձեռնարկներուն՝ ստացաւ ՀՀ Սփիւռքի Նախարարութեան «Ոսկեայ Մետալ»-ը:
Այս առիթով «Զարթօնք» իր ջերմ շնորհաւորութիւնները կը յայտնէ թերթիս բարեկամ Տիար Հրայր Տանձիկեանին մաղթելով արեւշատութիւն եւ յարատեւ կորով իր ազգանուէր ու հայրենանուէր գործունէութեանց մէջ:
