Յուլիս 11-ին, Պրիւքսէլի մէջ տեղի ունեցաւ Հայաստանի եւ Ազրպէյճանի արտաքին գործոց նախարարներ Էդուարդ Նալպանտեանի եւ Էլմար Մամետեարովի հանդիպումը` ԵԱՀԿ Մինսկի խումբի համանախագահներ Իկոր Փոփովի (Ռուսիա), Ռիչըրտ Հոկլընտի (Միացեալ Նահանգներ), Սթեֆան Վիսքոնթիի (Ֆրանսա) նախաձեռնութեամբ, որուն ներկայ էր նաեւ ԵԱՀԿ գործող նախագահի անձնական ներկայացուցիչ Անճեյ Քասփրչիկը: Այս մասին կը տեղեկացնէ ԱԳՆ լրատուական ծառայութիւնը:
Հանդիպման ընթացքին շարունակուեցան ղարաբաղեան կարգաւորման բանակցային գործընթացը առաջ մղելու նպատակով համապատասխան պայմաններ ստեղծելու շուրջ քննարկումները:
Էդուարդ Նալպանտեան ընդգծած է շփման գիծի վրամ իրավիճակի կայունացման անհրաժեշտութիւնը ու այդ նպատակով շեշտած Վիեննայի եւ Ս․Փեթերզպուրկի գագաթնաժողովներուն ձեռք բերուած պայմանաւորուածութիւններու իրագործումը:
Եռանախագահները արտաքին գործոց նախարարներէն խնդրած են նախագահներուն փոխանցել իրենց առաջարկը այս տարուան ընթացքին գագաթնաժողովի կազմակերպման վերաբերեալ:
Պայմանաւորուածութիւն ձեռք բերուեցաւ արտաքին գործոց նախարարներու յաջորդ հանդիպումը կայացնել Սեպտեմբերին Նիւ Եորքի մէջ` ՄԱԿ-ի գլխաւոր նստաշրջանի ծիրէն ներս:
