Կիրակի, 26. 05. 2024

spot_img

Խմբագրատանս մէջ. Դաշնակահարուհի Ռիթա Աղտամլեան – Ասիլեանի Հետ

«Զարթօնք»ի խմբագրատան մէջ հաճելի էր հանդիպիլ դաշնակահարուհի եւ դաշնամուրի ուսուցչուհի Ռիթա Աղտամլեան – Ասիլեանի հետ:

«Դաշնակ սկսած եմ նուագել փոքր տարիքէս։ Սկզբնական շրջանին՝ անձնական դասընթացներով, իսկ երբ պատերազմի տարիներուն մեկնեցանք Ֆրանսա, ուսումս շարունակած եմ այնտեղ: Արդէն 28 տարի է Լիբանանի մէջ դաշնակի անձնական դասեր կու տամ. ունիմ 42 աշակերտ` 7-19 տարեկան»:

Տարի մը առաջ էր, երբ Ռիթայի ոչ-հայ աշակերտներէն մեծ խումբ մը հովանաւորութեամբ Լիբանանի մէջ ՀՀ դեսպանութեան՝ Թէքէեան Մշակութային Միութեան Տեղական Վարչութեան կազմակերպութեամբ, համերգ մը տուաւ Պէյրութի մէջ ուր ոչ-հայկական երիտասարդ մատներ նուագեցին հայկական եղանակներ: Հետաքրքրական երեւոյթ մըն էր, որ ՀՀ Սփիւռքի բծախնդիր նախարար Հրանոյշ Յակոբեանի ուշադրութենէն չէր վրիպած եւ օրին ան պարգեւատրեց իւրաքանչիւր մասնակից:

Ուրախութեամբ իմացանք, որ շուտով Ռիթայի աշակերտներէն ներկայացուցչական խումբ մը ՝ թիւով 10 աշակերտ պիտի ունենայ նաեւ Հայաստանի մէջ, ուր աշակերտներէն տասն պիտի մեկնին Հայաստան յառաջիկայ Յուլիս 4-ին, համերգ մը տալու համար Երեւանի Առնօ Բաբաջանեան համերգասրահին մէջ, ուր դարձեալ ոչ հայ մատներ պիտի նուագեն Հայ երաժիշտներու գործեր:

«Ձեռնարկին նպատակն է ամրապնդել Լիբանան-Հայաստան մշակութային կապերը», ըսաւ մեր հիւրը: «Գաղափարը յղացաւ Լիբանանի  Հայաստանի Հանրապետութեան դեսպանատան մէջ: Ձեռնարկը պիտի հովանաւորեն ՀՀ Սփիւռքի եւ Մշակոյթի նախարարութիւնները: Ձեռնարկը իր ներկայութեամբ պիտի պատուէ նաեւ Հայաստանի մէջ Լիբանանի դեսպանը». մեզի տեղեկացուց Տիկ. Ասիլեան:

«Առաքելութիւնս համարած եմ լիբանանեան շրջանակի մէջ Հայկական մշակոյթ տարածել, որուն մէկ կարեւոր անդրադարձը պիտ հանդիսանայ այս ձեռնարկը: Ես կը հաւատամ, որ Հայ ժողովուրդը գոյատեւած է, որովհետեւ ստեղծագործած է եւ ոչ միայն ստեղծագործած է, այլ ան իր ստեղծագործութիւնները փոխանցած է աշխարհին, որպէս մարդկային մշակոյթի մէկ կարեւոր մասնիկ», եզրափակեց մեր յարգելի հիւրը:

Մեր կողմէն աւելցնենք, որ  սոյն ձեռնարկը կը համընկնի Թէքէեան Մշակութային Միութեան 70-ամեակին:

«Խմբ.»

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին