ՀԲԸՄ ՀԵԸ-ի Անթիլիասի Մայրերու Վարչութեան կազմակերպութեամբ, Ուրբաթ, 31 Մարտ, 2017 ին, ՀԲԸՄ-ի Տեմիրճեան Կեդրոնին մէջ տեղի ունեցաւ աւանդական TEA TIME –ը՝ երկու հարիւր մասնակիցներու ներկայութեամբ, որոնց շարքին էին Լիբանանի մէջ Հայաստանի Հանրապետութեան Լիազօր Դեսպանին Տիկինը Էլիզապէթ Մկրտչեանը եւ անձնակազմի տիկինները: Հիւրերու շարքին էին նաեւ յայտնի անձնաւորութիններ, ՀԵԸ-ի Կեդրոնական Վարչութեան անդամներու եւ
Գործադիր Մարմիններու տիկիններէն եւ ՀԲԸՄ-Ի տիկնանց վարչութիւններու եւ
այլ միութեանց պատասխանատու կանանց ներկայացուցիչներ:
ՀԵԸ-ի Անթիլիասի Մայրերու Վարչութեան ատենապետուհի տիկ. Մայտա
Քիւրէճեանը բարի գալուստի ջերմ խօսքերով ողջունեց բոլոր ներկաները եւ
բարի ժամանց մաղթեց՝ ներկայացնելով խնամքով պատրաստուած յայտագիրը: Տիկ.
Քիւրէճեան անդրադարձաւ վարչութեան անցեալի գործունէութեան եւ
powerpoint-ի նկարներով ընդհանուր ակնարկ մը կատարեց այդ ձեռնարկներուն վրայ:
Ապա, ան ներկայացուց օրուան յայտագիրը:
Օրուան հիւրը տիկ. Մարալ Պուճիքեան բեմ հրաւիրուեցաւ՝ ներկայացնելու համար
Զատկուան տօնին առիթով պատրաստուող տարբեր ուտեստներու խոհագիրները, ինչպէս՝ գունաւոր Չէորէկին, Սուշիի կարկանդակին եւ Քինօայով աղցանին:
Ներկաները մեծ խանդավառութեամբ հետեւեցան տիկին Մարալ Պուճիքեանի բացատրութիւններուն:
Յայտագիրի աւարտին տիկ. Մայտա Քիւրեճեան շնորհակալութիւն յայտնեց տիկ.
Պուճիքեանին եւ վարչութեան կողմէ յիշատակի նուէր մը յանձնեց յարգելի
հիւրին:
Ձեռնարկի ընթացքին տեղի ունեցաւ վիճակահանութիւն: Ներկաները բախտաւորուեցան արժէքաւոր նուէրներով:
Բոլորը հրաւիրուեցան ճաշակելու համեղ խմորեղէններ եւ անուշեղէններ:
Վարձքը կատար ՀԵԸ-ի Անթիլիասի Մայրերու Վարչութեան անդամուհիներուն
այս շատ օգտաշատ հաւաքոյթին եւ բծախնդիր աշխատանքին համար:
