Կիրակի, 03. 03. 2024

spot_img

25 Գարուններ… Հայոց Բանակը Հայ Պետականութեան Պահապանն է

«Բանակն ազգի ինքնաճանաչման հայելին է, բոլոր հայերու ծնունդն է, հայութեան հաւաքական կերպարը, անոր պատասխանատուութիւնը, անոր պատմութեան վերագնահատումը եւ հայեացքը ապագային։»

Սպր. Վազգէն Սարգիսեան

            25 տարի առաջ Հայաստանի Հանրապետութեան ազգային հերոս՝ սպարապետ Վազգէն Սարգիսեանի հրամանագիրով կազմաւորուեցաւ Հայաստանի Հանրապետութեան Զինուած Ուժերը: 25 տարի ետք, Հայոց Բանակը իր բազուկները սեղմած ու լայնաթափ սփռած կը սաւառնի բարձունքներ, յաղթանակներ արձանագրելով ու իր շարքերը համալրելով արդիական զրահներով եւ սարքաւորումներով:

Սակայն, Հայկական բանակին գործունէութիւնը ներհայկական, ապահովական եւ պաշտպանողական ծիրին մէջ չի սահմանափակուիր, այլեւ միջազգային գետնի վրայ իր ուրոյն եւ հաստատուն դիրքը կը փայփայէ, հպարտօրէն արդարացնելով իր կատարած առաքելութիւնը:

28 Յունուարի կէսօրուան ժամը 12-ին, տօնական մթնոլորտ մը կը տիրէր Հարաւային Լիբանանի Շամաա գիւղին մէջ գտնուող ԻՒՆԻՖիԼ-ի իտալական զօրանոցին մէջ: Հոն, հայկական զօրագունդը պիտի նշէր Հայոց Բանակի
25-րդ յոբելենական տարեդարձը:

Այս հպարտ առիթով, Լիբանանի մէջ Հայաստանի Հանրապետութեան դեսպան՝ Տիար  Սամուէլ Մկրտչեան, Մերձաւոր Արեւելքի մէջ Լեռնային Ղարաբաղի Հանրապետութեան մնայուն ներկայացուցիչ՝ Տիար Կարօ Քեպապճեան, ինչպէս նաեւ ՌԱԿ Լիբանանի Շրջանային վարչութեան անդամ՝ Ընկ. Սեդրակ Քիւրէճեան , ԹՄՄ տեղական վարչութեան ներկայացուցիչ` Օրդ. Անի Պոզոյեան, Վահան Թէքէեան Միջն. վարժարանի ուսուցիչներ՝ Պրն. Աւետիս Տիպան, Տիկ. Ռիթա Թամուկեան, Օրդ. Սիլվա Պոզոյեան եւ լիբանանահայեր ուղղուեցան հարաւ` մասնակցելու համար պաշտօնական շքեղ հանդիսութեան, որմէ ետք ճաշակեցին հայկական տոհմիկ եւ աւանդական ուտեստներ՝ պատրաստուած հայկական զօրագունդի զինուորներուն եւ խումբ մը լիբանանահայերու կողմէ: Ընկերային մթնոլորտի մը մէջ բարեմաղթութիւններ եւ յուշանուէրներ փոխանցուեցան հայ զինուորներուն:

Հանդիսութիւնը սկսաւ Լիբանանի, Հայաստանի եւ ՄԱԿ-ի քայլերգներու յոտնկայս ունկնդրութեամբ ու դրօշներու տողանցքով, որմէ ետք միջազգային խաղաղապահ ուժերուն մաս կազմող հայկական զօրագունդի հրամանատար՝ Կարէն Աթոյեան ողջունեց դեսպան Մկրտչեանը: Մկրտիչ քհնյ. Քէշիշեան «Տէրունական Աղօթք»-ով եւ պահպանիչով օրհնեց հայկական ջոկատն ու ներկաները, ապա ներկաները մէկ վայրկեան յոտնկայս յարգեցին Նահատակներուն յիշատակը:

20170128_141621

Հրամանատար Կարէն Աթոյեան ողջունելով ներկաները շնորհակալութիւն յայտնեց պատիւը ընդունելու եւ իրենց հետ կիսելու յոբելենական ուրախ պահերը, ապա խօսքը ուղղելով հայկական ջոկատի զինուորներուն ըսաւ. «Դուք ամիսներ առաջ կը գտնուէիք ղարաբաղեան սահմանագիծին վրայ եւ ձեր առաքելութիւնը կատարած էք հպարտութեամբ: Դուք հասկցած էք խաղաղութեան գինը` ձեր սեփական մարմինին վրայ զգալով արկերու մահաբեր սարսուռը: Այժմ դուք կը գիտակցիք խաղաղութեան արժէքը եւ այսօր կը կատարէք խաղաղապահ առաքելութիւն, քաջ գիտակցելով անոր խոր իմաստը իւրաքանչիւր երկրի եւ ընտանիքի համար»:

20170128_141820

Հայաստանի Հանրապետութեան դեսպան Տիար Սամուէլ Մկրտչեան, իր կարգին ջերմ ու գորովալից խօսքերով շնորհաւորեց Հայոց Բանակին ստեղծման յատկանշական 25-ամեակը, յորդորելով կառչած մնալ հայրենիքի սուրբ հողին, պահպանել կայունութիւնը տարածաշրջանին մէջ եւ սատարել միջազգային խաղաղապահութեան: Ան նաեւ բարձր գնահատեց միջազգային խաղաղապահ ուժերուն առաքելութիւնը` նշելով որ, աւելի ազնիւ գործ չկայ քան երկրի մը եւ ժողովուրդի մը խաղաղութեան ապահովումը: Շնորհաւորական խօսքի աւարտին ան շեշտեց ըսելով.- «Անփորձանք մնացէ՛ք եւ ծառայեցէ՛ք ի խնդիր Լիբանանի խաղաղութեան եւ ժողովուրդի կայուն բարգաւաճման ու զարգացման»:

20170128_134307

Տեղի ունեցաւ նաեւ վկայագիրներու, պատուոգիրներու եւ շնորհակալագիրներու փոխադարձ տուուչութեան արարողութիւն, ուր պատուարժան Հայաստանի Հանրապետութեան դեսպանը պատուեց զօրանոցի հրամանատար գնդապետ-զօրավար Ուկո Չելլոն, հարիւրապետ Կարէն Աթոյեանը, ԻՒՆԻՖԻԼ-ը, Լիբանանեան բանակին եւ հայկական զօրագունդի զօրավարները, ենթասպաները եւ յիսնապետները, որմէ ետք Հայաստանի մասին ցուցադրուեցաւ տպաւորիչ, հետաքրքրական ու միեւնոյն ժամանակ գօտեպնդիչ տեսաերիզ մը, որ իր դրական դրոշմը ունեցաւ նաեւ ներկայ օտար երկիրներու ներկայացուցիչներու մօտ: Աւելի ուշ տեղի ունեցաւ 25-ամեակին նուիրուած կարկանդակի հատում, ձեռամբ վսեմաշուք դեսպան Մկրտչեանին եւ հրամանատար Աթոյեանին:

20170128_135522

Հայկական ջոկատի 32 զինուորներէ բաղկացած խումբի անդամները ազգային երգերով ու պարերով զարդարեցին տօնական հանդիսութիւնը:

20170128_135446

Յոբելենական այս տօնակատարութեան առիթով՝  ՌԱԿ-ի եւ ԹՄՄ-ի ներկայացուցիչները գեղեցիկ յուշանուէրներով պատուեցին հայկական ջոկատի զինուորները, անոնց նուիրելով արծաթեայ խաչքարէ պատրաստուած թեւնոցներ: Իսկ Վահան Թէքէեան Միջն. վարժարանի ուսուցիչները իրենց ոգեւորիչ խօսքերով ողջունեցին քաջարի զինուորները ու անոնց նուիրեցին գրքոյկներ, որոնց մէջ տեղ գտած էին վարժարանի միջնակարգ Բ. Եւ Գ. կարգերու աշակերտներուն կողմէ գրուած ու հայ զինուորին ուղղուած սրտի խօսքեր:

Հայոց Բանակը հայ պետականութեան սիւնն է ու յաւերժ պահապանը: Փառք ու պատիւ մեր քաջարի առիւծներուն: Թող 25  գարուններ տօնուին մեր աննկուն ու խրոխտ հայոց բանակին եւ հայոց պետականութեան:

Պէյրութի Վահան Թէքէեան Վարժարանի
Լրատուական Գրասենեակ

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին