ԱՄՆ Քալիֆորնիա նահանգի Սան-Տիեկօ քաղաքին մէջ ծնած 8 տարեկան Սոնա Դանիէլեանը, ֆէյսպուքի (facebook) վրայ տեսնելով Մարտակերտի թիւ 2 դպրոցի սաներուն եւ ուսուցչական կազմի ուժերով զինուորներուն համար հաւաքուած նուէրներու արկղները, շատ տպաւորուած է եւ որոշած է օգնել Արցախի զինուորներուն: Աղջնակը, տարբեր աշխատանքներ կատարելով, մօրը վարսավիրանոցին մէջ մօրը օգնելով 200 տոլար գումար հաւաքած է:
Ըստ «Հայերն այսօր»-ի` այս արարքին իբրեւ արդիւնք 32 տոպրակ առաջին օգնութեան դեղամիջոցներ ձեռք բերուած են եւ յանձնուած՝ զինուորներուն:
«Անասելի լաւ զգացողութիւն է, որ աշխարհի մի անկիւնում նման հայուհի է ապրում ու նման ոգիով ձեւաւորւում որպէս անձ: Սոնա ջան, բալաս, ապրես դու, հպարտ ենք քեզնով ու շնորհակալ ենք ծնողներիդ` նման փայլուն դաստիարակութիւն տալու համար»,- կը գրէ երգչուհի, պատգամաւոր Շուշան Պետրոսեան իր ֆէյսպուքեան (facebook) էջին վրայ, որ եւս օգնած է, որ աղջնակին ցանկութիւնը իրականութիւն դառնայ:
