Ռուսիոյ Դաշնութեան Պետդուման, Դեկտեմբեր 14-ին, ընդունեց Ռուսիոյ եւ Հայաստանի միջեւ հաւաքական անվտանգութեան կովկասեան տարածաշրջանի մէջ հակաօդային պաշտպանութեան տարածաշրջանային համակարգի ստեղծման համաձայնագիրի վաւերացման օրինագիծը:
Փաստաթուղթը Ռուսիոյ խորհրդարանի ստորին պալատի քննարկման ներկայացուցած էր ՌԴ նախագահ Վլատիմիր Փութին,-կը տեղեկացնէ «Արմենփրես»-ը` յղում ընելով ՌԻԱ Նովոսթիին:
Հայաստանի հետ համաձայնագիրը ստորագրուած էր 2015 թուականի Դեկտեմբեր 23-ին, Մոսկուայի մէջ: Ատով կը նախատեսուի «Հակաօդային պաշտպանութեան միաւորուած տարածաշրջանային համակարգի` իբրեւ ԱՊՀ-ի մասնակից պետութիւններու հակաօդային պաշտպանութեան միացեալ համակարգի բաղկացուցիչ մասի ստեղծում»:
«Հայաստանը միշտ ալ մեր գործընկերն ու դաշնակիցը եղած է կովկասեան տարածաշրջանին մէջ: Համաձայնագիրի վաւերացումը կը համապատասխանէ Ռուսիոյ պետական շահերուն»,- յայտարարած Է Պետդումայի ԱՊՀ-ի գործերու, Եւրասիական համարկումի եւ հայրենակիցներու հետ կապերու կեդրոնի կոմիտէի ղեկավար Լէոնիտ Քալաշնիքով:
