5 Դեկտեմբեր 2016-ին, Մարսէլի Արժէթուղթերու Պալատին մէջ (Palais De La Bourse) տեղի ունեցաւ «Աշխարհի համերը» խորագիրով ամէնամեայ ձեռնարկը, ուր Մարսէլի մէջ ՀՀ գլխաւոր հիւպատոսութեան հովանիի ներքոյ ներկայացուած էր նաեւ հայկական տաղաւարը: Ձեռնարկը կազմակերպուած էր Մարսէլ-Փրովանսի Առեւտրի համաշխարհային կեդրոնի, Առեւտրաարդիւնաբերական պալատներու եւ Երկկողմ գործարար ակումբներու միութիւններուն (l’UCCCAB) կողմէ, որուն կը մասնակցէին աւելի քան 30 երկիրներու գլխաւոր հիւպատոսութիւններ` ներկայացնելով իրենց երկիրներու խոհանոցի առանձնայատկութիւնները, գիւղատնտեսական, գինեգործական աւանդոյթներն ու նորոյթները: Այս մասին կը յայտնեն ՀՀ ԱԳՆ մամլոյ ծառայութենէն:
Ձեռնարկին այս տարուան նշանաբանը մարմնամարզութիւնն էր, որ պայմանաւորուած էր Մարսէլը 2017-ին մարմնամարզութեան եւրոպական մայրաքաղաք հռչակելու եւ 2024 թուականի Ողիմպիական խաղերու իրականացման համար Փարիզի թեկնածութիւնը առաջադրելու հանգամանքով:
ՀՀ հիւպատոս Սամուէլ Լալայեան եւ Ֆրանս-հայկական առեւտրաարդիւնաբերական պալատի նախագահ Պերնարտ Հատէմեան հանդիսաւոր կերպով հայկական տաղաւարին բացումը կատարեցին, ուր ներկայացուած էին Հայաստանի մէջ արտադրուած գինիներ, քոնեակներ եւ այլ հայկական խմիչքներ, հայկական լեռնաշխարհին մէջ աճող բնական խոտաբոյսերէ պատրաստուած թէյեր եւ թուրմեր, անուշներ, հայկական ճաշարանին կողմէ պատրաստուած ազգային խորտիկներ: Հայկական տաղաւարին մէջ այցելուներուն հայկական խմիչքներ կը հիւրասիրէր 2008-ին Ֆրանսայի լաւագոյն մառանապետ ճանչցուած Սերժ Ղուկասեան:
Հաշուի առնելով, որ ձեռնարկը ունէր մարզական նշանաբան` ձեռնարկին իրենց մասնակցութիւնը բերին նաեւ, Էւերեստի գագաթը նուաճած լեռնագնաց Արա Խաչատրեանը եւ «Արծիւ» մարզական ակումբի սաները:
Հայկական տաղաւարը մեծ հետաքրքրութիւն յառաջացուց եւ ջերմօրէն ընդունուեցաւ այցելուներուն կողմէ:
