Սփիւռքի նախարար Հրանոյշ Յակոբեանէն այսօր խորհրդարանին մէջ լրագրողները հետաքրքրուած են, թէ Հայաստանի դրամատուներուն մէջ 1000-ական տոլար դնելու առթիւ սփիւռքահայերուն ուղղուած իր կոչին արձագանգ եղա՞ծ է:
«Օ, այո՜: Երէկ այնպիսի մի մեծ գումարի մասին լսեցի, որ հաճոյք ստացայ: Մէկն օրինակ ինձ ասաց, որ 1.5 միլիոն բերեցինք, ներդրեցինք հայկական պանքերում (դրամատուն-ԵՌԳ․): Դա հաճոյք էր: Եւ կարող եմ Ձեզ ցոյց տալ այն նամակները, այն հարցադրումները, այն վերաբերմունքը, որ սփիւռքահայերն արեցին: Օրեր առաջ մի կին եկաւ Լիբանանից, 200 հազար տոլար էր բերել եւ խնդրում էր, որ ես օգնեմ, բայց ես ասացի` «Դուք կարող էք բոլոր պանքերում դնել»: Ինձ համար նշանակութիւն չունի որ պանքում, ինձ համար կարեւորը, որ գումարը մեր պանքերում լինի, եւ պանքի տոկոսները ցածրանան»,- ըսած է Հրանոյշ Յակոբեան:
Աւելին` ըստ Հրանոյշ Յակոբեանի, իր կոչէն ետք գումարներու հոսք եղած է, բայց քանի որ երեւոյթը ինքնին գաղտնի է, չեն կրնար հրապարակայնացնել:
Հրանոյշ Յակոբեան նշած է նաեւ, որ Գանատայէն սփիւռքահայ մը իւրաքանչիւր դստեր համար 3000-ական տոլար դրած է դրամատուներու մէջ: «Աղմուկը տարածուեց Սփիւռքում, իմացան եւ սկսեցին դնել»,- ըսած է ան:
«Մենք Սփիւռքին դիտարկում ենք ե՛ւ ֆինանսական ռեսուրս (աղբիւր-ԵՌԳ․), ե՛ւ մտաւոր ռեսուրս (ներուժ-ԵՌԳ․), ե՛ւ մշակութային ռեսուրս, եւ ընդհանրապէս կապեր, կարողութիւններ, յարաբերութուններ, մօտեցումներ»,-յայտարարած է Սփիւռքի նախարար Հրանոյշ Յակոբեան` մեկնաբանելով Սերժ Թանգեանի, Արսինէ Խանջեանի եւ այլ յայտնի սփիւռքահայերու յայտարարութիւնները, որ Սփիւռքը կ՛օգտագործուի միայն տնտեսական եւ շահադիտական նպատակներով:
Ան բերած է Հրայր Յովակիմեանի օրինակը, որ 1992-ին Հայաստան գալով` ոչինչ բերաւ, բացի իր խելքէն, փորձէն, իր վիրահատելու հմտութենէն եւ Հայաստանի մէջ ստեղծեց սրտի վիրահատութեան դպրոց ու համակարգ:
Հրանոյշ Յակոբեանի խօսքով` մամոկրաֆիայի կեդրոնը նոյնպէս լաւ օրինակ է, ուր ամէն տարի ստուգման երթալը սովորութիւն դարձած է, եւ այդ գիտելիքն ու փորձը բերուած է Սփիւռքէն:
«Սփիւռքը հզօրագոյն պոտենցիալ է (կարողականութիւն-ԵՌԳ), որ պէտք է օգտագործել»,- ըսած է Հրանոյշ Յակոբեան:
Ըստ անոր, անցնող 8 տարիներուն 96 մասնագիտական համաժողովներ կազմակերպուած են, որոնց ժամանակ Սփիւռքի մասնագէտներ հանդիպած են հայաստանեան մասնագէտներու հետ` քննարկումներ եւ ծրագիրներ իրականացնելու եւ փորձի փոխանակումներ կատարելու համար:
Նախարարին խօսքով` «Հայաստան» համահայկական հիմնադրամի դրամահաւաքը աչքի կը զարնուի, բայց ատիկա ալ Լեռնային Ղարաբաղին օգնելու համար է:
«Ի վերջոյ, ազատ մարդիկ են, ինչ ուզեն, այդպէս էլ կարող են խօսել, մենք չենք կարող նրանց ասել` ինչո՞ւ էք խօսում»,- ըսած է Հրանոյշ Յակոբեանը` կոչ ընելով լրագրողներին հաշուի առնել, որ նախարարութեան 90 աշխատակիցները կ’աշխատին 7 միլիոն մարդու հետ, իսկ միւս նախարարութիւնները` 3 միլիոնի:
Հրանուշ Յակոբեանի կարծիքով բնական է, որ սփիւռքահայերուն կարծիքները պէտք է տարբեր ըլլան, քանի որ անոնք բազմաշերտ են, տարբեր երկիրներու քաղաքական ու տնտեսական վարչակարգերու ազդեցութեան տակ են եւ մեծ պատմութիւն դարձնել պէտք չէ:
