Կիրակի, 03. 03. 2024

spot_img

Երփներանգ Ծաղիկներ Դարձան Ծաղկեփունջ Երեկոն Ստացաւ Երանգ Հայահունչ

*ՀԱՄԲԻԿ ՄԱՐՏԻՐՈՍԵԱՆ*

Աղուոր ու անմոռանալի գիշեր մը եւս ապրեցանք ուրախ ու զուարթ, երբ փունջ–փունջ նորափթիթ ծաղիկներ՝  կրտսեր, պատանի, պարման ու պարմանուհի, իբրեւ հայութեան յաւերժի ճանապարհին վրայ ընթացող  մէկական համեստ սիրալիր թիթեռներ, մեզի պարգեւեցին արուեստի եզակի ելոյթ մը,  գեղեցիկ ժամանց մը՝ ջերմութիւն ու սէր ցանելով արուեստի ու մշակոյթի սիրահար մեր հոգիներուն:

Կասկած չկայ, որ ամիսներու քրտնաթոր աշխատանքը պտղաւորուեցաւ Շաբաթ, 3 Դեկտեմբեր 2016-ի երեկոյեան, Էմիլ Լահուտի անուան Համագումարներու պալատի երդիքին տակ, ուր շնորհիւ բարձրաճաշակ արուեստասէր արուեստագիտուհի եւ հմուտ պարուսոյց Գայիանէ Մածունեանի անխոնջ ջանքերուն՝ ՀԲԸՄ- ՀԵԸ-ի «ԱՐԻՆ» պարախումբը տուաւ իր այնքան սպասուած տարեկան ելոյթը, որ խլեց ծափ, ժպիտ, գոհունակութիւն ու նաեւ  ուրախութեան արցունք:

3 (2)

Բառերով գնահատական տալ իրապէս դժուար է կատարուած աշխատանքին, զոր տեսանք..: Մօտաւորապէս 150 պարողներ, մերթ խմբային, մերթ անհատական, եւ մերթ հաւաքական՝ այսինքն ամբողջական կազմով, բեմին տուին կենդանութիւն, աշխուժութիւն, կեանք եւ եռանդ… այդ պատճառով ալ՝ ոգեւորուած հանդիսատեսը չզգաց, թէ որքան արագ անցան վայրկեանները եւ բեմի վարագոյրը եկաւ հաղորդելու, թէ երեկոն աւարտեցաւ՝ դառնալու համար ապագայի գողտրիկ յուշ, կամ անջնջելի յիշատակ:

11 (2)

Արուեստասէր հասարակութեան համար երեկոն տպաւորիչ էր իր պարզ, բայց խորհուրդ ու իմաստութիւն առթող բեմով, ուր հայկական գորգանմոյշներ ու կարպետանմոյշներ կու գային մեզ փոխադրել հայկական աշխարհ, որոնք կարծես մանրանկարիչի մը հարազատ վրձինին ստեղծագործութիւնը եղած ըլլային, որոնց ազդեցութեան տակ պահ մը ճամբորդեցինք հայրենի Կիւմրի… ուր ծնած ու ապրած էր մեծատաղանդ հայ երաժիշտ ու երգահան Խաչատուր Աւետիսեանը, որուն յիշատակին նուիրուած էր «ԱՐԻՆ» պարախումբին «ՀԱՅՈՑ ՀՈՎԻԿ» տարեկան գեղարուեստական ելոյթը, իբրեւ յարգանքի տուրք՝ հանճարեղ երաժիշտին՝ արժանաւորապէս:

13 (2)

Առինքնող երեկոն վստահաբար պիտի ապրի ներկաներու յիշողութեան մէջ, սակայն պէտք է արդարօրէն ըսել, որ Հայ Երիտասարդաց Ընկերակցութեան պատասխանատուներուն, ղեկավարութեան ու նամանաւանդ պարախումբի վարչութեան համբերատար տիկիններուն ճիգերը, գլխաւորութեամբ՝ ատենապետուհի Տիկին Անի Պոտրումեանի, լաւագոյնս  պտղաւորուեցան այդ երեկոյ լաւագոյնս, եւ երեկոն դարձաւ  իրապէս ՀԱՅԱԲՈՅՐ, ՀԱՅԱՇՈՒՆՉ ու ՀԱՅԱՀՈՒՆՉ միաժամանակ, որուն ազդանշանը տուաւ Արազ Չէրչեան, երբ կարեւոր  համարեց հայ մշակոյթի պատմութեան մէջ պարարուեստի ունեցած դերն ու տեղը՝ մինչեւ օրս՝ հանգամանօրէն:

18 (1)

Քիչ անգամ կը պատահի նման խանդավառ երեւոյթ, ուր ակնդիր եւ ունկնդիր հասարակութիւնը դիտէ, տեսնէ, ապրի եւ վայելէ զուտ հայաշունչ ու զուարթ մթնոլորտ, որ յագեցած ըլլայ իրաւ արուեստով, պարերու ճշգրիտ ընտրութեամբ, երաժշտութեան սրտամօտ հնչիւններով եւ տարազներու ճոխ այլազանութեամբ:  Ինչ որ տեսանք, ու ըմբոշխնեցինք, մեծ հաճոյք էր թէ՛ կազմակերպչական, թէ՛ մատուցման, թէ՛ պարային եւ թէ՛ ներկայացուցչական իմաստով, զորս հարկ է գնահատել ըստ արժանւոյն, քանի որ ան ունէր արուեստի մակարդակ ու չափանիշ, թէ՛ իբրեւ պարային խաղարկութիւն  եւ թէ՛ իբրեւ այժմէական բեմադրութիւն:

Այս առթիւ հետաքրքրական էր հայկական պարարուեստին անծանօթ հիւրերու եւ պատասխանատու դէմքերու հիացումն ու գովաբանական արտայայտութիւնները, ի տես հրամցուած բարձրաճաշակ ելոյթին, որ պիտի մնայ անկրկնելի:

Պէտք է խոստովանիլ, որ գեղարուեստական ղեկավար Գայիանէ Մածունեան, իբրեւ շնորհալի պարուսոյց, գերազանցեց ինքզինք այդ երեկոյ, (մանաւանդ յայտագրի «Տաղ Սիրոյ» խորագիր բաժնին մէջ), ուր  ան, աւելի շատ փորձառու մանկավարժ էր ու վաստակաւոր ուսուցիչ, քան պարզ պարադրող մը, որ կրցած էր վարպետութեամբ իր ճիպոտին տակ հաւաքել 150 պարողներ, որոնց կ’առաջնորդէր իր կախարդական անգոյ գաւազանով… աշխուժութիւն ու ոգեւորութիւն սերմանելով սրահէն ներս, պահ մը մոռցնել տալով մեզի, թէ պարողները արհեստավարժներ չեն… այլ սիրողական տարրեր:

Շատ բնականաբար, յաջող երեկոն ունէր նաեւ իր «անծանօթ զինուորներ»-ը, որոնք նոյնպէս արժանի են արդար գնահատանքի: Ստէպ առ ստէպ փոխուող ճաշակաւոր տարազները, աւելի ու աւելի գեղեցկացուցած էին  հրամցուած պարերը, որոնց յղացումը եւ ձեւաւորումը ստանձնած էր բեմավար, մեր բոլորին ծանօթ դերասան ու բեմադրիչ Վարդան Մկրտիչեանը: Անշուշտ, երեկոյեան յաջողութեան մէջ իրենց բաժինը ունէին  պարուսոյցի օգնականներ՝ Արարատ Ճէրէճեանը, Արազ Աքըլեանը եւ Սեւակ Աբէլեանը, դիմայարդարումը իրականցնող Կարինէ Խաչատուրեանը եւ այլ նուիրեալներ,  որոնց թափած քրտինքը, տարած յոգնութիւնը եւ ժամանակը բարձր է ամէն գնահատանքէ եւ դրուատումէ:

Եզրակացնելով,  պիտի աւելցնենք, որ վայելեցինք բարձրորակ երեկոյ, ճաշակաւոր երաժշտութիւն, հաճելի բեմադրութիւն, որոնց ազդեցութեան  ու հմայքին  դարձած գերի՝ հեռացանք սրահէն: Կը հաւատանք, որ սփիւռքահայ իրականութեան մէջ որեւէ  լուրջ նախաձեռնութիւն, կը նպաստէ օտարութեան մէջ մեր տարուած համահայկական պայքարին, պատնէշ  հանդիսանալու եւ դէմ դնելու համար մեզի սպառնացող բոլոր մարտահրաւէրները:

ՀԲԸՄ-ի հիմնադրութեան 110-ամեակին եւ ՀԵԸ-ի հիմնադրութեան 85-ամեակի ծիրէն ներս հրամցուած սոյն ձեռնարկը կու գայ անգամ մը եւս փաստելու, թէ մեր կարաւանը կը քալէ՝ բարձրաճակատ ու հպարտ,  բոլոր ժամանակներէն աւելի անխոտոր եւ անսայթաք երթով, միշտ հաւատալով գալիք արշալոյսներու աւետումներուն:

Իսկ երբ դուրս կու գայինք սրահէն, բարձր տրամադրութեան մէջ կը զգայինք, թէ մեզ վերէն կը հսկէր ու մեզի կ’ընկերանար այն բարի էակը՝ Արինը, որ անժամանակ հեռացած էր մեզմէ եւ այդ երեկոյ միայն մարմինով բացակայ էր ան..: Իսկ անոր հոգին, իբրեւ փիւնիկ թռչուն կը ճախրէր մեր գլխավերեւ..:

 

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին