Հայաստանի արտաքին գործոց նախարար Էդուարդ Նալպանտեան, Հայաստանի նախագահին զեկուցեց միջազգային կազմակերպութիւններուն մէջ Հայաստանի աշխոյժ ներգրաւուածութեան ուղղութեամբ նախարարութեան կողմէ իրականացուող աշխատանքներու ընթացքը, յառաջիկայ ընելիքներն ու ձեռքբերումները: Նալպանտեան ներկայացուց` օրերս Ֆրանախօս երկիրներու կազմակերպութեան 16-րդ գագաթնաժողովի ընթացքին կայացած որոշման համաձայն Հայաստանի կողմէ միջազգային հեղինակաւոր այդ կազմակերպութեան նախագահութեան ստանձնումը, ինչպէս նաեւ գագաթնաժողովի եզրափակիչ բանաձեւին մէջ ղարաբաղեան հիմնախնդիրի խաղաղ կարգաւորման կազմակերպութեան անդամ պետութիւններու լիակատար աջակցութեան ամրագրումը: Նախագահ Սերժ Սարգսեան նախարարի ուշադրութիւնը հրաւիրեց` Փարիզի մէջ նախատեսուած Հայաստանի դեսպաններու աւանդական հանդիպումի ընթացքին դիւանագէտներուն տրուելիք յանձնարարականներուն վրայ՝ ուղղուած յատկապէս տնտեսութեան բնագաւառին մէջ հետեւողական եւ աշխոյժ աշխատանքին՝ նկատի առնելով կառավարութեան նոր ծրագիրը եւ երկրին մէջ տեղի ունեցող բարեփոխումները: Սարգսեան նաեւ Նալպանտեանին յանձնարարեց դեսպաներու յաջորդ դեսպանահաւաք կազմակերպել Հայաստանի մէջ: Նախագահը նաեւ իր մօտեցումները ներկայացուց տնտեսական դիւանագիտութեան աշխուժացման աշխատանքին վերաբերեալ:
Էդուարդ Նալպանտեան Նախագահին Զեկոյց Ներկայացուց Նախարարութեան Կողմէ Իրականացուող Աշխատանքներու Ընթացքին Մասին
