Երկուշաբթի, 28. 04. 2025

spot_img

Ո՞ւր Կ’երթաս, Հա՛յ Ժողովուրդ . . .

*ԳԷՈՐԳ ՔԷՕՇԿԷՐԵԱՆ*

Քանի մը բարեկամներով, սրճարանը (coffee shop) նստած կը զրուցէինք սփիւռքահայութեան սպառնացող վտանգներու մասին։ Ամերիկայի մէջ, օրինակ՝

  • Հայկական վարժարաններու ուսանողները՝ դպրոցին մէջ անգամ հայերէն չեն խօսիր։
  • Մեզ յաջորդող սերունդները՝ հայերէն թերթ պիտի կարդա՞ն արդեօք։
  • Որքանո՞վ հայ պիտի մնան՝ օտար ամուսնութիւն կնքողները։

Կարծես առաջին երկու հարցերուն նկատմամբ մենք գրեթէ հաշտուած ըլլալ կը թուէինք՝ ուստի մեր ուշադրութիւնը կեդրոնացաւ օտար ամուսնութիւն կնքողներու ճակատագիրին վրայ։

Օտար ամուսնութիւն կնքողներու անմիջական պարագաները յաճախ կ’արդարացնեն զանոնք ըսելով թէ,

  • «Հարսերնիս օտար է, սակայն շատ լաւ հայերէն կը խօսի»:
  • «Մեր փեսան օտար է, սակայն շատ լաւ հայր է իր զաւակներուն»:
  • «Մեր հարսը օտար է, սակայն ամէն Կիրակի հայկական եկեղեցի կը յաճախէ։»
  • «Փեսանիս օտար է, սակայն տասը հատ հայու հետ չեմ փոխեր զինք։»

Այս պատճառաբանութիւնները ուրիշ բան չեն՝ եթէ ոչ «նրբացուցիչ դէպք յանցանաց» միայն։ Այսինքն, այրած սրտի անյաջող մխիթարանք . . .

Ինչ որ է, անցնինք մեր բուն նիւթին։ Ուրեմն մեր խօսակիցներէն մէկը մեզ տեղեակ պահեց, որ Պէյրութի հայկական երկրորդական վարժարանէ շրջանաւարտ երիտասարդ մը կ’ամուսնանայ հայ աղջկայ մը հետ եւ կը կազմէ ընտանեկան երջանիկ բոյն մը ու անոնք կը բախտաւորուին քանի մը զաւակներով։

Գործի ասպարէզը զինք կը նետէ Արաբական Ծոցի երկիրներէն մէկ մէջ, ուր կը հանդիպի օտար աղջկայ մը։ Աղջկան հետ իր յարաբերութիւնը զարգանալով, կ’որոշէ ամուսանանալ հետը։ Սակայն իր առաջին ամուսնութիւնը խոչընդոտ հանդիսանալով՝ կը փափաքի ամուսնալուծուիլ իր հայ կնոջմէն։

Երբ հայ կինը արգելք հանդիսանալով ամուսալուծում չի շնորհեր, ան կը դիմէ ծայրայեղ միջոցի մը։ Քանի որ ան կ’ապրէր իսլամական երկիրի մը մէջ, ուր օրէնքով կրնայ մէկը մինչեւ չորս կին ունենալ՝ իսլամ կը դառնայ եւ կ’ամուսնանայ իր սիրած հոմանոււհիին հետ . . . Հիմա ան՝ յաչս օրէնքի, պաշտօնապէս երկու կին ունի։

Թէեւ անիրաւ է մեր հայ երիտասարդը եւ իր արարքը խոտոր, սակայն ես ակամայ ճարպիկ եւ պատեհապաշտ պիտի որակեմ զինք՝ որ կրցաւ երկրին օէնքը գործադրել՝ ի նպաստ իրեն։ Ան հետեւեցաւ «նպատակը կ’արդարացնէ միջոցը» (the end justifies the means) լոզունգին, ոտնակոխելով բարոյական ամէն սկզբունք եւ խախտելով հայկական դաստիարակչութեան ու ազգային պատկանելիութեան բոլոր հիմերը։

Իր այս գռեհիկ արարքով, ան դաւաճանած եղաւ նախ իր ազգին՝ օտարի հետ ամուսնանալով, եւ ապա իր կրօնքին՝ դաւանափոխ ըլլալով։ Ո՞ւր մնացին հայ մայրերու զոհողութիւնները, որոնք տարագրութեան ժամանակ ինքզինքնին Եփրատ գետը նետեցին՝ որպէսզի կրօնափոխ չըլլան։ Իսկ մեր «հերոս»ը՝ կամայականօրէն կ’ընդունի մեզ ջարդող թուրքին իսլամութիւնը, որքա՜ն փոխուած են ժամանակները:

Բարեկամնե՛ր, ճերմակ ջարդը կը սպառնայ բոլորիս՝ աշխարհի որ անկիւնը որ ապրինք։ Հայուն համար միակ ապահով ապաստանը իր հայրենիքն է եւ պէտք է մենք ամէն գնով անսասան պահենք զայն եւ աշխատինք, որ ան դառնայ բարգաւաճ եւ բարեբեր երկիր մը, որ կարենայ ներգրաւել բոլոր հայերը։

Վստահ եմ նմանօրինակ սրտաճմլիկ երեւոյթներ կան ամէնուրեք եւ դժբախտաբար անոնց թիւերը կ’աճին ու կը բազմանան, յուզում պատճառելով իւրաքանչիւր մտահոգ հայուն՝ հայրենիքի մէջ, թէ արտասահմանի օտար ափերուն վրայ։

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

Ելեկտրոնային Գրադարան

spot_img

Ara D. Kassabian CPA, based in Glendale, California, provides a full range of tax preparation, accounting and bookkeeping services, either in your facility or at our location. Making it quick and easy to file your taxes.

spot_img

Զօրակցիր Զարթօնք Օրաթերթին