*ՀԱՄՕ ՄՈՍԿՈՖԵԱՆ*
Իսկապէս անհաւատալի է, որ Միջին Արեւելքի քաղաքական ճգնաժամային այս օրերուն, տաղանդաւոր ղեկավար-երաժիշտ Վիգէն Չալեան կը յաջողի ի մի բերել հայ թէ արաբ հանրածանօթ երգիչ-երգչուհիներ, նոյնիսկ «Լիբանանի Հարս» պելառուս Աննա Մաթթարը՝ ներկայացնելու հոյակապ համերգ մը եւս, նախաձեռնութեամբ Թէքէեան Մշակութային Միութեան:
Արդարեւ, Կիրակի, 20 Նոյեմբեր 2016-ի երեկոյեան, հայաշատ Պուրճ Համուտի Յ. Տէր Մելքոնեան թատերասրահը ծայրէ ծայր լեցուն էր՝ ունկնդրելու եւ դիտելու The Big Band (Մեծ նուագախումբ)-ի բացառիկ համերգը:
Ներկայ էր Թէքէեան Մշակութային Միութեան աւագանին գլխաւորութեամբ նուագախումբի կնքահայր՝ ընկեր Յակոբ Գասարճեանի: Ներկայ էին ՌԱԿռի ղեկավար ընկերներ, յարգելի հիւրեր եւ մշակութասէր հանրութիւն մը:
Ծրագիրը բազմազան ու բազմալեզու էր՝ տեսահոլովակներով համեմուած: Մայր հայրենիքէն թէ Լիբանանէն մատուցուած երգի ու երաժշտութեան համընթաց Որոտընդոստ՝ «Զարթիր Լաօ»ն, ապա հայաստանեան ձայնով օժտուած Յակոբ Մկրտիչեանի ելոյթները՝ հայկական բազմազան քնարական եւ սիրային կատարումներով, ծափերու տարափի արժանացան հանդիսատեսին կողմէ: Երեկոյի անմար աստղ Լարա Չուխատար իր օփերային բացառիկ ձայնով եւ արտայայտչական գերազանց ներկայացմամբ յաճախ կրկնեց իր մատուցած երգերը, ներկաներու բուռն եւ յոտնկայս ծափողջոյններուն յագուրդ տալով: Ամերիկեան թէ եւրոպական էստրա ու ճազ երաժշտութեան եզակի կատարումներով հիացական ծափերու արժանացաւ պելառուս արուեստագիտուհի Աննա Մաթթայ, որ իր անգլերէնի ու ֆրանսերէնի բացառիկ առոգանութեամբ ու իւրայատուկ ձայնով, հմայեց բոլորը: Մանաւանդ աշխարհահռչակ «Շանսոնիէ» Շառլ Ազնաւուրի երգի դժուարին կատարմամբ Ճոնի Քէյ անսպասելի անակնկալ մատուցեց բոլորին…
Օրուան «հիւր» երգիչներէն՝ Պեքայի գեղեցկուհի, Զահլէէն Հաթէմ Քալլաս հանդիսատեսին փոխանցեց արաբական-լիբանանեան ուրախ երաժշտութեան աւիւնը: Անշուշտ այս բոլորին կ’ընկերակցէր բոլոր նուագախումբին զանազան գործիքները համադրող, ղեկավար-երաժիշտ Վիգէն Չալեանի «լռելեայն» վերահսկողութիւնը՝ աւելի քան մէկ ու կէս ժամ տեւած համերգին:
Շնորհալի արուեստագիտուհի Պէթի Սարգիսեան ներկայացուց Պիկ Պանտի բազմազգ անդամները: Անգնահատելի է հանրածանօթ դերասան-բեմադրիչ Տիրան Սարգիսեանի աշխատանքը, որուն տնօրէնի պատասխանատու ջանքերը, շուրջ տարի մը երկարող ժամանակաշրջանին մէջ, Թէքէեան Մշակութային Միութեան աջակցութեամբ, այսպիսի ուրախալի աւարտ ունեցան:
