Աթէնքի «Աւետիս» պարախումբը միացած է ՀՀ Սփիւռքի նախարարութեան «Դուն ի՞նչ կ’ընես Ղարաբաղի համար» համահայկական շարժումին, այս ձեւով իրենց զօրակցութիւնը յայտնելով Արցախին ու արցախահայութեան:
«Հայերն այսօր»-ի փոխանցմամբ` պարախումբը շարժման խորագիրին ծիրէն ներս ամրան մեծ ձեռնարկ պիտի կազմակերպէ նուիրելով Արցախին:
2013 թուականին ստեղծուած «Աւետիս» պարախումբի նպատակը հայանպաստ գործունէութեամբ զբաղիլն է, ինչպէս նաեւ ազգային մշակութային արժէքներու պահպանումը:
«Աւետիս» անուանուած է` նպատակ ունենալով կատարած աշխատանքով միշտ բարի լուրեր եւ լաւ տրամադրութիւն սփռել թէ՛ Հայաստանի, թէ՛ Սփիւռքի մէջ: Այժմ պարախումբ կը յաճախեն 35 երեխաներ: «Աւետիս»-ը նաեւ ԵՈՒՆԵՍՔՕ-ի պարի միջազգային խորհուրդի անդամ է:
Պարախումբը, 2016 թուականին, 6 պարուհիներով, առաջին անգամ մասնակցած է ՀՀ Սփիւռքի նախարարութեան «Իմ Հայաստան» համահայկական փառատօնին:
Պարախումբի գեղարուեստական ղեկավարն ու պարուսոյցը Շուշանիկ Սեմերճեանն է, տնօրէնը` Շուշանիկի ամուսինը` Կարէն Յակոբեանը:
