ՌԴ-ի արտաքին գործոց նախարար Սէրգէյ Լաւրով եւ Ֆրանսայի անոր պաշտօնակից Ժան Մարք Էյրօ Նոյեմբեր 17-ին կայացած հեռաձայնային զրոյցի ընթացքին քննարկած են ԼՂ հակամարտութեան կարգաւորման հարցը:
«Արծարծուած են մերձաւոր արեւելեան կարգաւորման եւ Լեռնային Ղարաբաղի հիմնախնդիրին լուծում գտնելու նպատակով ԵԱՀԿ-ի Մինսկի խումբի (Ռուսիա, ԱՄՆ, Ֆրանսա) համանախագահներու գործունէութեան աջակցելու հարցերը»,- նշած են նախարարութեան տեղեկատուականէն:
Սուրիոյ իրադրութիւնը քննարկելու ընթացքին՝ Լաւրով ընդգծած է միակողմանի գործողութիւններէն խուսափելու անհրաժեշտութիւնը, որոնք այդ երկրին մէջ կը հրահրեն հակամարտութեան սաստկացում:
Ըստ ՏԱՍՍ-ի` ՌԴ-ի եւ Ֆրանսայի ԱԳ նախարարները նաեւ քննարկած են «Նորմանտական քառեակ»-ին առաջնահերթ խնդիրները՝ ներուքրանական ճգնաժամի յաղթահարման ուղղուած Մինսկի համաձայնութիւններու կատարման ծիրէն ներս:
